સ્પોર્ટ્સ / ૨૦ રમતના ઉમેરા સાથે કુલ ૬૩ આ રમતોના ખેલાડીઓને સરકારી નોકરી મળશે; જાણો કેવી રીતે?

કેન્દ્રીય પર્સોનલ વિભાગે એક મોટો આદેશ જારી કર્યો છે. આ આદેશમાં કહેવામાં આવ્યું છે કે કેન્દ્રની મોદી સરકારે ગ્રૂપ-સી સ્તરનાં સરકારી પદો પર શાનદાર ખેલાડીઓની સીધી ભરતી માટે રમતોની યાદીમાં રસ્સીખેંચ, મલખંબ અને પેરા-સ્પોર્ટ્સ જેવી ૨૦ નવી રમતો સામેલ કરી છે. કેન્દ્ર અંતર્ગત આવનારા રમતગમત વિભાગ તરફથી ભારત સરકારના મંત્રાલયો-વિભાગોમાં કોઈ પણ ગ્રૂપ-સી પદ પર ખેલાડીઓની ભરતી માટે ૪૩ રમતોની યાદીમાં કેટલીક વધુ રમતોને સામેલ કરવાના મળેલા પ્રસ્તાવ બાદ આ નિર્ણય કરવામાં આવ્યો છે.

રાષ્ટ્રીય-આંતરરાષ્ટ્રીય સ્પર્ધાઓમાં રાજ્ય-દેશનું પ્રતિનિધિત્વ કર્યું હોય તો તે સરકારી નોકરી મેળવવા પાત્ર

જે ખેલાડીઓએ આ ૬૩ રમતની યાદીમાંથી કોઈ પણ રમતમાં રાષ્ટ્રીય અથવા આંતરરાષ્ટ્રીય સ્પર્ધાઓમાં કોઈ પણ રાજ્ય અથવા દેશનું પ્રતિનિધિત્વ કર્યું હોય તો તે ગ્રૂપ-સી પદ માટે સરકારી મેળવવા પાત્ર બનશે. આમ દેશના હજારો ખેલાડીઓ માટે આ ખુશ દેનારા સમાચાર છે. ખાસ  કરીને એ ખેલાડીઓ માટે, જેઓ નોકરી માટે ફાંફા મારી રહ્યા છે, જેમણે ક્યારેક દેશનું પ્રતિનિધિત્વ અલગ અલગ રમતમાં કર્યું છે. આ ઉપરાંત જે ખેલાડી નેશનલ એવોર્ડથી સન્માનિત થઈ ચૂક્યા છે તેમને પણ સરકારના આ નિર્ણયથી ફાયદો થશે. જોકે ભરતી માટે પણ ખેલાડીઓએ આવેદન કરવું પડશે. ત્યાર બાદ પદના હિસાબે ખેલાડીનો અભ્યાસ, યોગ્યતા, અનુભવ અને ઉંમર જેવી જરૂરી ચીજોને પણ નજરમાં લેવાશે.

આટલી ગેમોના ખેલાડીઓને મળશે લાભ 

અગાઉની નીતિ અનુસાર તીરંદાજી, એથ્લેટિક્સ (ટ્રેક એન્ડ ફિલ્ડ સ્પર્ધા સહિત), આત્યા-પાત્યા, બેડમિન્ટન, બોલ-બેડમિન્ટન, બાસ્કેટ બોલ, બિલિયર્ડ્સ એન્ડ સ્નૂકર, બોક્સિંગ, બ્રિજ, કેરમ, ચેસ, ક્રિકેટ, સાઇકલિંગ, હોર્સરાઇડિંગ, ફૂટબોલ, ગોલ્ફ, જિમ્નાસ્ટિક (બોડી બિલ્ડિંગ સહિત), હેન્ડબોલ, હોકી, આઇસ સ્કીઇંગ, આઇસ-હોકી, આઇસ-સ્કેટિંગ અને જૂડોની સાથે કબડ્ડી, કરાટે-ડો, કયાકિંગ અને કેનોઇંગ, ખોખો, પોલો, પાવર લિફ્ટિંગ, રાઇફલ શૂટિંગ, રોલર સ્કેટિંગ, રોઈંગ, શોફ્ટ બોલ, સ્ક્વોશ, સ્વીમિંગ, ટેબલ ટેનિસ, ટાઇક્વોન્ડો, ટેનિસ, વોલીબોલ, રેસલિંગ અને નૌકાયાન જેવી રમતો સામેલ કરવામાં આવી હતી.

હવે મોદી સરકારે બેસબોલ, રગ્બી, બધિર રમતો, રસ્સી ખેંચ, મલખંબ અને પેરા સ્પોર્ટ્સ (પેરા ઓલિમ્પિક અને પેરા એશિયા ગેમ્સમાં સામેલ રમતો) સહિત ૨૦ વધુ રમતોને આ યાદીમાં સામેલ કરવામાં આવી છે. ઉલ્લેખનીય છે કે દેશના ઘણા ખેલાડીઓ સરકારી મેળવવા માટે તરસી રહ્યા છે. સરકારનો આ નિર્ણય તેમના માટે આશાનું એક કિરણ લઈને આવ્યો છે.