OMG / શ્રદ્ધાનો હો વિષય તો પુરાવાની શું જરૂર? બોટાદના શિવ મંદિરની ગળતીમાં સાપ બિરાજતા ભક્તો દર્શને ઉમટ્યા

• મંદિરમાં ભક્તોનો દરિયો ઘૂઘવ્યો
• સાપ શિવલિંગની ગળતીમા જઈ બેસી ગયો
• આ ઘટનાનો વિડીયો સોશિયલ મીડિયા ખૂબ વાયરલ થઈ રહ્યો છે

માનવ જીવન ભક્તિથી ખીચોખીચ ભરેલુ છે. તેવામાં જ્યાં ભક્તિ હોય છે ત્યાં શ્રદ્ધા અને ચમત્કાર પર અવારનવાર સામે આવતા હોય છે. આવો જ એક ચમત્કાર કહી શકાય તેવો કિસ્સો બોટાદમાં સામે આવ્યો હતો. બોટાદ શહેરમાં આવેલ ગોતેશ્વર મહાદેવ મંદિર કે જ્યાં હનુમાનજી મહારાજ સાથે ગોતેશ્વર મહાદેવ પણ બિરાજમાન છે અને હરણકુઈ વિસ્તારમાં આ મંદિર આવેલ છે. જે મહાદેવ મંદીરમાં બપોરના સમયગાળા દરમિયાન કોબ્રા સાપ અચાનક આવી ચડયો હતો અને શિવલિંગ પરની ગળતીમા જઈ બેસી ગયો હતો. આ સમગ્ર દ્રશ્ય પૂજારીને ધ્યાને આવ્યા બાદ આ અંગેના વાવડ વહેતા થતાં આજુબાજુના ભક્તો દર્શન અર્થે ઉમટી પડ્યા હતા જેને લઈને મંદિરમાં ભક્તોનો દરિયો ઘૂઘવ્યો હતો. 

પૂજારીએ નાગ દેવતાની આરતી ઉતારી ધૂપ-દિપ કરી દૂધ ધર્યું
મોટી સંખ્યામાં લોકો દર્શનાર્થે ઉમટી પડતાં ભક્તોનું કીડિયારું ઉભરાયું હતું. જે દર્શનનો લોકોએ લાભ લઇને ધન્યતા અનુભવી હતી.નાગદેવતાએ ગળતી પર ફેણ માંડી ભક્તોને દર્શન આપ્યાં હતાં. વધુમાં મંદિરના પૂજારીએ નાગ દેવતાની આરતી ઉતારી ધૂપ-દિપ કરી દૂધ ધર્યું હતું. ચમત્કાર સમાન આ ઘટનાનો વિડીયો હાલ સોશિયલ મીડિયા ખૂબ વાયરલ થઈ રહ્યો છે.