પાર્થ દાસગુપ્તાએ મુંબઈ પોલીસને આપેલા લેખિત નિવેદનમાં દાવો કર્યો છે કે અર્નબ ગોસ્વામીએ તેમને ફેમિલી ટ્રીપ માટે 12000 અમેરિકી ડોલર આપ્યા હતા. તેમણે કહ્યું કે ગોસ્વામીએ રિપબ્લિક ટીવીની તરફેણમાં રેટિંગ આપવા માટે મને 3 વર્ષમાં બીજા 40 લાખ આપ્યા હતા.
રેટિંગ ફિક્સિંગના બદલમાં અર્નબે મદદની ખાતરી આપી હતી
દાસગુપ્તાએ પોતાના નિવેદનમાં એવો પણ દાવો કર્યો છે કે હું ગોસ્વામીને 2004 થી ઓળખું છું. અમે ટાઈમ્સ નાઉમાં સાથેસાથે કામ કરતા હતા. 2013 માં હું BARC ના સીઈઓ તરીકે જોડાયો હતો. ગોસ્વામીએ 2017 માં રિપબ્લિક ટીવી લોન્ચ કરી હતી. રિપબ્લિક ટીવીના લોન્ચિંગ પહેલા જ તેણે મને લોન્ચિંગ પ્લાન અંગે જાણ કરી દીધી હતી અને મોઘમમાં તેની ચેનલ માટે સારા રેટિંગ અપાવવામાં મદદ માગી હતી. ટીઆરપી સિસ્ટમ કેવી રીતે ચાલે છે તેની મને જાણકારી છે તે વાત ગોસ્વામી સારી રીતે જાણતો હતો. ગોસ્વામીએ ભવિષ્યમાં મને મદદનું પણ વચન આપ્યું હતું.
અર્નબે બે ફેમિલી ટ્રીપ માટે આપ્યા 12000 ડોલર
દાસગુપ્તાએ તેમના નિવેદનમાં જણાવ્યું કે મેં ટીઆરપી રેટિંગમાં હેરફેર સુનિશ્ચિત કરવા માટે મારી ટીમ સાથે મળીને કામ કર્યું હતું જેમાં અમે રિપબ્લિક ટીવીને નંબર-1 રેટિંગ આપી હતી. 2017 થી 2019 સુધી આ બધું ચાલ્યું હતું. 2017 માં અર્નબ લોવર પરેલ સ્થિત સેન્ટ રેજીસ હોટલમાં મને મળ્યો હતો અને મને ફ્રાન્સ અને સ્વિઝરલેન્ડની ફેમિલી ટ્રીપ માટે 6000 ડોલર આપ્યા હતા. ત્યાર બાદ 2019 માં પણ અર્નબ મને રૃબરૃમાં મળ્યો હતો અને સ્વીડન તથા ડેનમાર્કની ટ્રીપ માટે 6000 બીજા ડોલર આપ્યા હતા. તે ઉપરાંત 2017 માં ગોસ્વામી ત્રીજી વાર આઈટીસી પરેલ હોટલમાં મને મળ્યો હતો અને 20 લાખ રોકડા આપ્યા હતા ત્યાર બાદ ગોસ્વામીએ મને 2018 10 લાખ અને 2019 માં પણ 10 લાખ આપ્યા હતા.
નિવેદન દબાણ હેઠળ અપાયું : દાસગુપ્તાના વકીલે નિવેદનને નકાર્યું
દાસગુપ્તાના નિવેદન પર તેમના વકીલ અર્જુનસિંહે એવું જણાવ્યું કે અમે આ નિવેદનને સંપૂર્ણરીતે નકારીએ છીએ કારણ કે આ નિવેદન દબાણમાં આપવામાં આવ્યું હોવાનું લાગી રહ્યું છે. કોર્ટમાં તેની કોઈ પ્રામાણિકતા નથી. ઉલ્લેખીય છે કે મુંબઈ પોલીસે 11 જાન્યુઆરીના દિવસે 3600 પાનાની ચાર્જશીટ ફાઈલ કરી હતી જેમાં BARC ના પૂર્વ સીઈઓ દાસગુપ્તા, અને ગોસ્વામી વચ્ચેની કથિત વોટ્સએફ ચેટ, ફોરેન્સિક ઓડિટ રિપોર્ટ અને પૂર્વ કાઉન્સિલ કર્મચારી અને કેબલ ઓપરેટર સહિત 59 લોકોના નિવેદન સામેલ છે.