ગૂગલ સર્ચ હવે ફક્ત વિવિધ માહિતી શોધવા માટે મર્યાદિત નથી. ભારતમાં હવે ગૂગલ સર્ચથી તેમના મોબાઇલના પ્રિપેઇડ પ્લાનમાં રિચાર્જ પણ કરાવી શકશે. ગૂગલની આ નવી સુવિધાની મદદથી, યુઝર્સ તેમના એન્ડ્રોઇડ ફોન પર વિવિધ કંપનીઓના રિચાર્જ પેકની સરખામણી પણ કરી શકશે.
ગૂગલની આ નવી સુવિધા હાલમાં ફક્ત સાઇન ઇન કરેલા એન્ડ્રોઇડ યુઝર્સ માટે જ છે. તેમાં એરટેલ, વોડાફોન-આઇડિયા, રિલાયન્સ જિઓ અને બીએસએનએલના પ્રીપેડ પ્લાન છે. આ સુવિધાની મદદથી, યુઝર્સ ગૂગલ સર્ચનો ઉપયોગ કરીને પ્રિપેઇડ મોબાઇલ પ્લાન્સ જોઇ શકે છે અને રિચાર્જ કરી શકે છે.
આ સુવિધાનો ઉપયોગ કરવા માટે ગુગલમાં 'પ્રિપેઇડ મોબાઇલ રિચાર્જ', 'સિમ રિચાર્જ' જેવા કીવર્ડથી સર્ચ કરવું પડશે. સર્ચ રિઝલ્ટમાં મોબાઇલ રિચાર્જ સેકશન દેખાશે. તેમાં ફોન નંબર,ઓપરેટર અને સર્કલ વગેરેની જાણકારી આપ્યા બાદ 'બ્રાઉઝ પ્લાન્સ' પર ટેપ કરવું પડશે. તે પછી તમારા સ્ક્રિન પર ઉપલબ્ધ પ્રીપેડ પ્લાન્સ દેખાશે. જેમાંથી તમે તમારી જરૂરિયાત અનુસાર પ્લાન પસંદ કરી શકો છે. વિવિધ પ્લાન્સમાં ચાલતી ઓફર સહિતની જાણકારી મળશે. તે પછી યુઝર જે તે કંપનીના નામ પર ટેપ કરીને એપ કે વેબસાઇટથી રિચાર્જ કરી શકે છે.
ગુગલની નવી સુવિધા માટે હાલ FreeCharge, MobiKwik, Google Pay અને Paytmને લિસ્ટ કરવામાં આવ્યા છે. રિલાયન્સ જિઓ, વોડાફોન-આઇડિયા, એરટેલ અને બીએસએનએલ આ સુવિધા સાથે કામ કરી રહ્યા છે. દરેક પ્રોવાઇડના પેજ પર બેક ટુ ગુગલ ઓપ્શન આપવામાં આવ્યો છે. જેના પર કલિક કરતાં ફરી સર્ચ ઓપ્શન ઓપન થાય છે. કન્ફર્મેશન પેજ પર યુઝરને રિચાર્જ માટે કસ્ટમર સપોર્ટ ઇન્ફર્મેશન એકસેસ પણ આપવામાં આવે છે.