ગુગલ મેપમાં ખાસ ભારત માટે ઉપયોગી ફિચર એડ કર્યું છે. ગુગલ મેપમાં દેશભરમાં આવેલા 45 હજાર જેટલા કોમ્યુનિટી અને પબ્લિક ટોઇલેટસ તેના લોકેશન સાથે એડ કરવામાં આવ્યા છે. ગુગલે કેન્દ્ર સરકારના લુ રિવ્યું કેમ્પેન સાથે હાથ મિલાવ્યા છે.
જેનો આશય પબ્લિક ટોઇલેટ અંગે લોકોના પ્રતિભાવ અને રેટિંગ જાણવાનો છે. ગુગલના ટોઇલેટ લોકેટરને લોકોને સારો પ્રતિભાવ મળી રહ્યો છે. જોકે ગુગલ મેપમાં નાના-મોટા શહેરોના ટોઇલેટની જ વિગતો છે. ગ્રામ્ય વિસ્તારના ટોઇલેટનો ડેટા હજુ ભારત સરકારે ગુગલને આપ્યો નથી.
ગુગલ મેપથી નાગરિકો દેશના 1700 જેટલા શહેરમાં પબ્લિક ટોઇલેટ લોકેટ કરી શકે છે. ગુગલ સર્ચ અને ગુગલ આસીસ્ટન્ટથી પણ તેનું લોકેશન જાણી શકાય છે. આ પ્રોજેકટની શરુઆત આમ તો ગત સપ્ટેમ્બરમાં સ્વચ્છ ભારત અભિયાન હેઠળ કરાઇ હતી. સૌથી મહત્વની વાત એ છે કે તેમાં યુઝર્સ ટોઇલેટ અંગે પોતાનો રિવ્યુ આપી શકશે. તેથી સરકાર માટે પણ જયાં જરુર હોય ત્યાં સુધારા કરવાનું આસાન બનશે.
ઉલ્લ્ખનીય છે કે આપણા દેશમાં પબ્લિક ટોઇલેટની હાલત બહુ ખરાબ હોય છે. નિયમિત સફાઇ અને મેન્ટેનન્સનો અભાવ પણ લગભગ દરેક જગ્યાએ જોવા મળે છે. કેટલાક લોકો પબ્લિક ટોઇલેટમાં તોડફોડ કરતા હોય છે અને પારાવાર ગંદકી કરે છે. પાણી ન આવતું હોવાની બુમો પણ અવારનવાર ઉઠતી રહે છે.
અમદાવાદ સહિતના મહાનગરોમાં પણ પબ્લિક ટોઇલેટની સ્થિતિ પણ ખાસ સારી નથી. ત્યારે લોકોના રિવ્યુથી પરિસ્થિતિ કેટલી સુધરશે તે હવે જોવાનું રહે છે.