ગુગલ મેપ એક એવુ પ્લેટફોર્મ છે, જેનો ઉપયોગ એક જગ્યાએથી બીજી જગ્યાએ કારમાં જતી વખતે મોટાભાગના વાહનચાલક કરે છે. ખાસ કરીને એવા રૂટ્સ પર જ્યાં વાહન ચાલક પહેલી વખત યાત્રા કરી રહ્યાં હોય અથવા રસ્તાની જાણકારી ના હોય. ગુગલ મેપે ખોટો રસ્તો બતાવી મુશ્કેલીમાં નાખી દીધા હોય એવા અનેક કેસ સામે આવ્યાં છે.
કેરળના કડુથુરૂપીમાં આવો એક મામલો સામે આવ્યો છે. અહીં એક પરિવારની કારને ગુગલે રસ્તામાંથી ભટકાવીને મોટી નહેરમાં પહોંચાડી દીધા. જો કે, આજુબાજુના લોકોએ સમય રહેતા આખા પરિવારને કારમાંથી બહાર નિકાળ્યો અને મોટી દુર્ઘટના ટળી ગઇ. સ્થાનિક રિપોર્ટ મુજબ, કર્ણાટકનો એક પરિવાર મુન્નારથી અલાપ્પુઝા ફરવા જઇ રહ્યો હતો. પરિવાર એક એસયુવી કારમાં સવાર હતો. બુધવારે સવારે આ લોકો કારમાં નિકળ્યા હતા. મુન્નારથી નિકળતી વખતે આ લોકોએ ગુગલ મેપ પર નેવિગેશન લગાવ્યું હતુ. ત્યારબાદ કાર ચલાવી રહેલો શખ્સ ગુગલના બતાવેલા રસ્તાને ફૉલો કરવા લાગ્યો.
સ્થાનિકોએ કારમાં બેઠેલા લોકોને બહાર કાઢ્યા
બુધવારે બપોરે કડુથુરૂપીમાં કુરૂપ્પથંરા કદવુની પાસે અચાનક કાર એક મોટી નહેરમાં ઘુસી ગઇ. પીડિત પરિવારે જણાવ્યું કે ગુગલ જે રસ્તો બતાવી રહ્યુ હતુ તે જ રસ્તા પર અમે ચાલી રહ્યાં હતા. ગુગલે સીધા જવાનુ કહ્યું પરંતુ ત્યાં મોટી નહેર હતી. જ્યારે નહેર પહેલા મોટો વળાંક હતો. ગુગલે સીધા જવાનુ કહ્યું તેથી કાર ચાલકે ત્યાં વળાંક ના લીધો. જેના કારણે કાર ઊંડી નહેરમાં ફસાઈ ગઇ. કાર નહેરમાં જતા જ પરિવારજનો જોરજોરથી બૂમો પાડવા લાગ્યા. જેને સાંભળીને આજુબાજુના લોકો ઘટનાસ્થળે એકઠા થયા હતા અને એક-એક કરી લોકોને કારની અંદરથી બહાર કાઢ્યા. સ્થાનિકોએ કારને પણ ખેંચવાની કોશિશ કરી. પરંતુ તેઓ સફળ થયા નથી. બાદમાં કારને બહાર કાઢવા માટે એક લૉરીનો સહારો લીધો.