રસ્તો ખબર ન હોય તેવા સરનામે પહોંચવા માટે ગુગલ મેપનો લોકો વ્યાપક ઉપયોગ કરે છે. ગુગલ મેપ પર રિયલ ટાઇમ ટ્રાફિક ચેક કરીને ઓછા ટ્રાફિકવાળા રસ્તો પણ મેપ બતાવે છે. તે સામાન્ય રીતે પીક અવર્સમાં ઘણું ઉપયોગી સાબિત થાય છે. જોકે ગુગલ મેપ ક્યારેક લોચા પણ મારે છે. તેનો અનુભવ કોલોરાડોના 100 જેટલા કારચાલકોને થયો.
આ તમામ લોકોએ ઝડપથી ડેનેવર એરપોર્ટ પહોંચવા ગુગલ મેપનો સહોરો લીધો અને ગુગલ મેપે તમામને ભારે વરસાદ બાદ કાદવથી ખરડાયેલા સાંકડા રસ્તા પર મોકલી દીધા. એરપોર્ટ જવાના મુખ્ય રસ્તા પર એકસીડન્ટ થતા ગુગલ મેપે કારચાલકોને અન્ય વૈકલ્પિક રસ્તો સુચવ્યો હતો. અહીંથી પસાર થવાના પ્રયાસમાં અનેક કારચાલકો ફસાઇ ગયા હતા અને ટ્રાફિકજામ સર્જાયો હતો.
ઝડપથી એરપોર્ટ પહોંચવાના બદલે કેટલાક તો સમયસર પણ પહોંચી શકયા ન હતા.પતિને લેવા એરપોર્ટ જઇ રહેલી એક મહિલાએ જણાવ્યું હતું કે મુખ્ય રસ્તો હતો ત્યાંથી એરપોર્ટ પહોંચવામાં 43 મિનિટ લાગશે તેમ ગુગલ મેપ બતાતો હતો. જયારે અન્ય રસ્તા પર તે સમય 23 મિનિટ બતાવ્યો હોઇ અનેક કારચાલકો તે રસ્તે ગયા હતા.
રસ્તા પર કાદવ જોયા પછી પણ આગળ અન્ચ કાર જતી હોઇ તેને લાગ્યું કે આગળ રસ્તો બરોબર હશે.ગુગલે પણ આ બનાવની નોંધ લેવી પડી હતી અને સ્પષ્ટતા કરી હતી કે ડ્રાઇવીંગ રુટ સજેસ્ટ કરતી વખતે અમે રસ્તાની સાઇઝ, ટ્રાફિક સહિતની અનેક બાબતોને ધ્યાનમાં લઇએ છીએ. તેમ છતાં હવામાન સહિતના આકસ્મિક સંજોગોમાં આવી સ્થિતિ કયારેક સર્જાય છે. તેથી કારચાલકોએ આવી પરિસ્થિતિને ધ્યાનમા રાખીને પોતાની રીતે નિર્ણય લેવો જોઇએ.