ટેકનોલોજી / Appleના સફારી બ્રાઉઝરમાં બગ: એન્ટિ-ટ્રેકિંગ ફિચર જ ટ્રેકિંગનું કામ કરે છે!

ગૂગલના સિક્યુરિટી એન્જિનિયર્સે એક રિપોર્ટમાં ખુલાસો કર્યો છે કે સફારી બ્રાઉઝરમાં લુપહોલ એટલે કે ખામી છે જે યુઝર્સની ગોપનીયતા જોખમમાં મુકે છે. તેનો લાભ લઈને હેકર્સ સફારી બ્રાઉઝરથી યુઝર્સનો પર્સનલ ડેટા મેળવી શકે છે. હેકર્સ યુઝર્સની બ્રાઉઝિંગ હિસ્ટ્રી જોઈ શકે છે. જોકે એપલનો દાવો છે કે સફારી બ્રાઉઝરનો આ બગ ફિકસ કરી દેવાયો છે. 

ગૂગલના રિપોર્ટમાં કહેવામાં આવ્યું છે કે સફારી બ્રાઉઝરની ઇન્ટેલિજન્ટ ટ્રેકિંગ પ્રિવેન્શન (આઈટીપી)માં એક ખામી હતી. આઇટીપી ફિચર ખરેખર યુઝર્સને ટ્રેકિંગમાંથી બચાવવા માટે આપવામાં આવ્યું છે. જ્યારે તે તેનાથી ઉલ્ટું કામ કરીને ટ્રેક કરવામાં મદદ કરતી હતી. સામાન્ય રીતે જ્યારે તમે કોઈ વેબસાઇટની મુલાકાત લો છો ત્યારે તમને કૂકીઝને પરમિશન આપવાનું કહેવામાં આવે છે. પરંતુ સફારીમાં એવું નથી. સફારી કોઈપણ વેબસાઇટ પર કુકીઝ માટે મંજૂરી આપતી નથી, પરંતુ બગને કારણે વેબસાઇટ્સને કુકીઝની પરમિશન મળવાનું શરૂ થયું હતું.

જો કે, આ પહેલીવાર નથી જ્યારે સફારી બ્રાઉઝરની પ્રાઇવેસી પર સવાલ ઉઠાવવામાં આવ્યા છે. ગયા વર્ષે પણ સફારી બ્રાઉઝરમાં ડુ નોટ ટ્રેક નામનું ફિચર હતું જે એપલે પાછળથી હટાવી દીધું હતું. આ ફિચરનો લાભ લઈને વેબસાઇટ્સ સરળતાથી યુઝર્સને ટ્રેક કરી શકતી હતી.