ગુગલનું ક્રોમ બ્રાઉઝર મોબાઇલ, લેપટોપ અને પીસીમાં સૌથી પોપ્યુલર છે. ક્રોમ સહિતના બ્રાઉઝર ફ્રી છે પરંતુ યુઝર્સને સૌથી વધુ અણગમો થાય છે તે એડવર્ટાઇઝ. એટલે કે સતત થતા જાહેરખબરના મારાથી. તમે ગમે તે વેબસાઇટ ખોલો પણ એડ તમારો પીછો છોડતી નથી. જેની કમાણીનો મુખ્ય સોર્સ એડ પર છે તે ગુગલે પણ પેજમાં ગમે ત્યારે આવી જતી ઇન્ટ્રસીવ એડસને બ્લોક કરી છે.
યુઝર્સના મુડને ધ્યાનમાં રાખીને ગુગલ હવે ક્રોમમાં સીપીયુ, ડેટા અને બેટરી જેવા રિસોર્સનો વધુ પડતો ઉપયોગ કરતી એડ બંધ કરવા જઇ રહ્યું છે. જે ક્રોમ બ્રાઉઝરના ચાહકો માટે સારા સમાચાર છે. ગુગલ 'હેવી એડ ઇન્ટરવેન્શન' નામનું ફિચર ડેવલપ કર્યું છે.
જે શરુઆતમાં 4 મેગાબાઇટથી વધુ બેન્ડવીથ કે પછી સીપીયુના રિસોર્સને 60 સેકન્ડ કે તેથી વધુ યુઝ કરતી હોય તેવી એડને બ્લોક કરી દેશે. વધુ ડેટાના આધારે આગળ જતાં આ ક્રાઇટેરિયામાં ફેરફાર પણ થઇ શકે છે.
અત્યારે વણનોતર્યા મહેમાનની જેમ ટપકી પડતી એડસમાં આવી એડસનું પ્રમાણ 10 ટકા જેટલું છે. આવી એડ બ્લોક થશે ત્યારે સ્ક્રીન પર તેની લીન્કની ડિટેઇલ સાથેની એક નોટિસ આવશે જેમાં આ એડ બહુ બધા રિસોર્સીસનો ઉપયોગ કરે છે તેવી માહિતી હશે. ક્રોમમાં આ ફિચર આવે ત્યારે ખરું,પણ પ્લે સ્ટોર પરથી એવા ઘણા ફાસ્ટ અને સિકયોર બ્રાઉઝર ફ્રીમાં ડાઉનલોડ કરી શકાય છે જેમાં ઇનબિલ્ટ એડ બ્લોકર હોય છે.