વોઇસ આસીસ્ટન્ટ અથવા તો ડિજિટલ આસીસ્ટન્ટ તરીકે જાણીતા ગુગલ આસીસ્ટન્ટ, સિરી અને એલેકસા સમયની સાથે તાલ મિલાવીને વધુને વધુ સ્માર્ટ બની રહ્યા છે. જબરદસ્ત ડેટાબેઝ અને આર્ટિફિશિયલ ઇન્ટેલિજન્સના કારણે લોકોના પ્રશ્રના જવાબ વધુ સચોટ રીતે આપે છે જોકે આ ત્રણેયમાં અત્યારે ટોપ પર ગુગલ આસીસ્ટન્ટ હોવાનું એક અભ્યાસમાં બહાર આવ્યું છે.
ગુગલ આસીસ્ટન્ટ સાચા અને સચોટ જવાબ આપવામાં એપલના સીરી તથા એમેઝોનના એલેકસા કરતા આગળ છે. લુપ વેન્ચરર્સ દ્વારા આ ત્રણેયનો આઇકયુ ટેસ્ટ લેવાયો હતો. ત્રણેય આસીસ્ટન્ટને એક સરખા 800 પ્રશ્ન પુછવામાં આવ્યા હતા. જેમાં નજીકના સ્થળો, ચીજવસ્તુઓનો એનલાઇન ઓર્ડર, નેવિગેશન વગેરેનો સમાવેશ કરાયો હતો. તેના દ્નારા નિષ્ણાતો જાણવા માગતા હતા કે આસીસ્ટન્ટ તમારા પ્રશ્નને કેટલી સારી રીતે સમજી શકે છે અને કેટલો સચોટ રિસ્પોન્સ આપે છે.
ગુગલ આસીસ્ટન્ટે આ પરીક્ષામાં 93 ટકા પ્રશ્નના સાચા જવાબ આપ્યા હતા. તમામ 800 પ્રશ્નને બરોબર સમજયા હતા. સીરીનો નંબર બીજો આવ્યો હતો. સિરીએ 83 ટકા પ્રશ્નનો જવાબ સાચો આપ્યો હતો.
જોકે સીરીએ બે પ્રશ્રને સમજવામાં ભુલ કરી હતી. એલેકસાના 80 ટકા જવાબ સાચા પડયા હતા. એલેકસાએ માત્ર એક પ્રશ્ન સમજવામાં ગરબડ કરી હતી. ગત વર્ષે પણ આ રીતે કરાયેલા ટેસ્ટમાં ગુગલ આસીસ્ટન્ટે 86 ટકા, સીરીએ 79 ટકા અને એલેકસાએ 61 ટકા સાચા જવાબ આપ્યા હતા. તે રીતે જોતા એક વર્ષમાં ત્રણેય આસીસ્ટન્ટ વધુ પરફેકટ બની રહ્યા છે.
તેમાં પણ એલેકસા એક વર્ષમાં ખાસ્સો સુધારો કર્યો છે. માહિતી સંબંધી પ્રશ્નમાં ગુગલ આસીસ્ટન્ટ હજુ નંબર વન છે. સિરી યુઝરના કમાન્ડને વધુ સારી રીતે ફોલો કરે છે. જોકે આ બંને એલેકસા કરતા વધુ સ્માર્ટ છે.