બાળકો ભગવાનનું જ સ્વરૂપ હોય છે. આ વાત તો તમે રોજ કેટલાય લોકોના મોઢેથી સાંભળી હશે, પરંતુ બાળકોને દુનિયામાં લાવવા માટે ભગવાનના કેટલાં હાથ-પગ જોડવા પડે છે આ અંગે ક્યારેય વિચાર્યું છે? ભગવાને મહિલાઓને બાળકો પેદા કરવાની શક્તિ આપી છે પરંતુ ઘણી મહિલાઓને આ સુખ પ્રાપ્ત થતું નથી, જોકે, આમાં પણ લોકો હાર નથી માનતા અને નવી-નવી ટેક્નિકની શોધ કરે છે. જેથી તેમને બાળકનું સુખ પ્રાપ્ત થઈ શકે.
ફિલ્મ 'ગુડ ન્યૂઝ'માં આવા જ એક કપલની વાર્તા છે. જેમાં વરૂણ (અક્ષય કુમાર) અને દીપ્તિ બત્રા (કરીના કપૂર ખાન) એક મોડર્ન અને હાઈ-ફાઈ કપલ છે. જે મુંબઈમાં રહે છે અને આ બંને તેમના કરિયર પર ધ્યાન આપે છે અને બાળક પેદા કરવાની કોશિશમાં પણ લાગેલું છે.
દીપ્તિ બત્રાને બાળક જોઈએ છે અને વરૂણ આના કારણે મુશ્કેલીમાં મૂકાઈ ગયો છે. બંને ઉપર બંનેની ફેમિલી પ્રેશર કરી રહી છે. સાથે જ બંને ઘણાં પ્રયાસ પણ કરી રહ્યા છે છતાં દીપ્તિ કંસીવ કરી શકી નથી રહી, જેના કારણે બંને પરેશાન છે. જેથી આ બંનેના પરિવારજનો તેમને IVF (In-Vitro Fertilisation) દ્વારા બાળક પેદા કરવાની સલાહ આપે છે. વરૂણ અને દીપ્તિ IVF દ્વારા બાળક મેળવવા માટે ડોક્ટર પાસે જાય છે અને હોસ્પિટલમાં તેમનું અન્ય બત્રા કપલ એટલે કે હની (દિલજીત દોસાંજ) અને મોનિકા બત્રા (કિયારા અડવાણી)ની સાથે મિક્સઅપ થઈ જાય છે. હવે આ કન્ફ્યૂઝન વચ્ચે આ ચારેયનું શું થશે અને તેમના બાળકોનું શું થશે. તેના માટે તમારે ફિલ્મ જોવા જવું પડશે.
વરૂણ બત્રાના રોલમાં અક્ષય કુમારની એક્ટિંગ કાબિલે તારીફ છે. સાથે કરીના સાથેની તેની જોડી ફિલ્મને વધુ મનોરંજક બનાવે છે. બંનેની કેમિસ્ટ્રી અને જોડી કમાલની છે. વરૂણ દીપ્તિથી બિલ્કુલ અલગ દિલજીત અને કિયારાની જોડી પણ જોવાલાયક છે. આ બંને હમેશાં ખુશ રહે છે અને મસ્તીભર્યા અંદાજમાં જોવા મળે છે.
દિલજીતે ફિલ્મમાં હની બત્રાનો રોલ પ્લે કર્યો છે. ફિલ્મમાં તેના જોક્સ, પાગલપંતી અને ગુસ્સો જોવામાં મજા આવે છે. સાથે જ તેનો ડાંસ પણ જોવાલાયક છે. જોકે, કિયારાને અન્ય સ્ટાર્સ કરતાં થોડો ઓછો સ્ક્રીન સ્પેસ મળ્યો છે પણ તેણે મોનિકા બત્રાનો ભોળો અને ચંચળ અંદાજ બતાવ્યો છે અને તે બહુ જ સારો લાગે છે. ફિલ્મમાં કિયારાની આંખોમાં આંસુ જોઈને તમારી આંખોમાં પણ આંસુ આવી જશે. આ ચાર મુખ્ય રોલ સિવાય અક્ષયની બહેનના રોલમાં અંજાના સુખાની, ડોક્ટર જોશીના રોલમાં આદિલ હુસેન અને ટિસ્કા ચોપડાએ બહુ સારું કામ કર્યું છે. આ બધાં જ એક્ટર્સે તેમનો રોલ ખૂબ જ સારી રીતે નિભાવ્યો છે.
ડિરેક્શન
દિગ્દર્શક રાજ મહેતાની આ પહેલી ફિલ્મ છે અને તેણે તેને ખૂબ સરસ રીતે બનાવી છે. આઈવીએફ પ્રક્રિયાથી માંડીને પાત્રોની ભાવનાઓ અને માતા બનવાના દરેક પાસા પર પ્રકાશ પાડ્યો છે. તેણે પોતાની પટકથામાં આનંદ અને ભાવનાઓ વચ્ચે બેલેન્સ જાળવ્યું છે. ફિલ્મનું એડિટિંગ પણ ખૂબ સારું છે, જેથી તમને આ ફિલ્મ વધુ પડતી લાંબી નહીં લાગે. તેમાં ખૂબ જ જોરદાર જોક્સ અને ડાયલોગ્સ છે જે તમને ખૂબ હસાવશે. ફિલ્મનું સંગીત પણ સારું છે, જે પટકથાને વધુ સારી બનાવે છે.
તો આ એક હળવી અને શાનદાર ફિલ્મ છે. જો તમારે વીકેન્ડમાં આનંદ માણવો છે તો આ ફિલ્મ જોવા જવું જ જોઈએ.