આજથી એટલે કે 1 ઓગસ્ટથી નવા મહિનાની શરૂઆત થઇ ગઇ છે.
આ નવા મહિનામાં ઘર, કાર અને LPG ખરીદવું સસ્તુ થઇ ગયુ છે, આ સિવાય પણ ઘણી સુવિધાઓ પર સામાન્ય જનતાને રાહત મળી છે. તો જાણીએ તેના વિશે...
રસોઇ ગેસ થયો સસ્તો:
- સબસિડી વગરના રસોઇ ગેસ સિલેન્ડરની કિંમતમાં 62.50 રૂપિયાનો ઘટાડો કરવામાં આવ્યો છે. આ ઘટડા પછી સબસિડી વગરના અથવા તો બજાર કિંમતવાળા LPGની કિંમત 574.50 રૂપિયા પ્રતિ સિલેન્ડર થઇ ગઇ છે.
આ પહેલા જૂલાઇમાં સબસિડી વગરના LPG સિલેન્ડરની કિંમતમાં 100.50 રૂપિયાનું ઘટાડો થયો હતો. કુલ મળીને ગત 1 મહિનામાં સબસિડી વગરના LPG સિલેન્ડરની કિંમતમાં 163 રૂપિયાનો ઘટાડો કરવામાં આવ્યો છે. હવે સબસિડી વગરના અથવા તો બજારકિંમત વાળા LPGની કિંમત 574.50 રૂપિયા પ્રતિ સિલેન્ડર થઇ ગઇ છે. આ પહેલા જૂલાઇમાં આ સિલેન્ડર માટે 637 રૂપિયા ચૂકવવા પડતા હતા. જોકે સબસિડીવાળા LPG સિલેન્ડરની કિંમતમાં કોઇ બદલાવ કરવામાં આવ્યો નથી.
હોમ લોન થઇ સસ્તી:
- આજથી એટલે કે 1 ઓગસ્ટથી હોમ લોન સસ્તી થઇ ગઇ છે. વાસ્તવમાં હાઉસિંગ ફાઇનાન્સ કંપની HDFC અને યૂનિયન બેંક ઑફ ઇન્ડિયાએ હોમ લોનના વ્યાજ દર પહેલાની સરખામણીએ ઘટી ગયા છે.
HDFCએ અલગ-અલગ સમય માટે વ્યાજના દરમાં 0.10% ઘટાડો કર્યો છે. આ ઘટાડો નવી લોનની સાથે ચાલી રહેલી લોન પર પણ લાગૂ થશે. આ રીતે તાજેતરમાં જ યૂનિયન બેંક ઑફ ઇન્ડિયાએ માર્જિનલ કોસ્ટ ઓફ લેન્ડિંગ રેટ (MCLR)માં ઘટાડો કર્યો છે. બેંકે વિવિધ કાર્યકાળ માટેના બેંચમાર્ક રેટમાં 0.05-0.20% ઘટાડો કરવાની જાહેરાત કરી છે. રિઝર્વ બેંક ઓફ ઇન્ડિયા (RBI)એ ફેબ્રુઆરીથી અત્યાર સુધીમાં રેપો રેટમાં 0.75% ઘટાડો કર્યો છે. તેમણે પણ બેંકોને આનો ફાયદો વહેલી તકે ગ્રાહકોને ટ્રાન્સફર કરવા જણાવ્યું છે.
MCLR એટલે કે માર્જિનલ કોસ્ટ ઓફ લેન્ડિંગ રેટ પણ કહેવાય છે. તેમાં બેંક પોતાના ભંડોળના ખર્ચ અનુસાર લોનના દર નક્કી કરે છે. આ બેંચમાર્ક દર હોય છે. તે વધે તો તમારી એ બેંકમાંથી લેવામાં આવેલી દરેક પ્રકારની લોન મોંઘી થઈ જાય છે.
SBIની IMPS સર્વિસ ફ્રી:
આજથી એટલે કે 1 ઓગસ્ટથી ભારતીય સ્ટેટ બેંક (SBI) એ IMPS (ઇમીડિયેટ પેમેન્ટ સર્વિસ) ટ્રાન્જેક્શનને ફ્રી કરી દીધુ છે. વાસ્તવમાં SBI અત્યાર સુધી IMPS સર્વિસ માટે એક નક્કી કરેલો ચાર્જ લેતી હતી. આ ચાર્જ એમાઉન્ટની હિસાબથી બદલાતો રહેતો હતો. અહીંયા તમને જણાવી દઇએ કે, IMPS ઑનલાઇન રૂપિયા ટ્રાન્સફર કરવાની એક સુવિધા છે. જેની મદદથી તમે મિનિટોમાં 2 લાખ રૂપિયા સુધીની રકમ બીજી બેંકના એકાઉન્ટમાં ટ્રાન્સફર કરી શકો છો.
ઇલેક્ટ્રોનિક વાહનો થયા સસ્તા:
આજથી એટલે 1 ઓગસ્ટથી ઇલેક્ટ્રોનિક વાહનો ખરીદવા સસ્તા થઇ ગયા છે. વાસ્તવમાં ગત દિવસોમાં GST કાઉન્સિલે ઇલેક્ટ્રોનિક વાહનો પર GSTની દરમાં 12% ઘટાડીને 5% કરી દીધો. આ સિવાય ઇલેક્ટ્રોનિક વાહન ચાર્જર પર લાગતો દર 18%થી ઘટાડીને 5% કરી દેવામાં આવ્યો છે.