ગૃહિણીઓ માટે ખુશખબર હવે ઘર આંગણે દૂધની જેમ શાકભાજી પણ સહકારી ધોરણે મળશે

ગાંધીનગરઃ ગૃહિણીઓ માટે એક સારા સમાચાર છે. હવે ઘર આંગણે દૂધની માફક શાકભાજી પણ સહકારી ધોરણે મળશે. ગાંધીનગર જિલ્લા બાગાયત વિભાગ દ્વારા આ નવતર અભિગમ અપનાવવાનો નિર્ણય લેવામાં આવ્યો છે. બાગાયત વિભાગ અને મધુર ડેરી વચ્ચે આને લઈને સમજૂતી કરાર કરવામાં આવ્યો છે. 

મધુર બ્રાન્ડ અંતર્ગત શાકભાજીનું વેચાણ કરવામાં આવશે. વેચાણ માટે ખાસ પ્રકારે વ્યવસ્થા ઊભી કરાશે. જેથી ઘર આંગણા સુધી શાકભાજી મળી રહેશે. ખેડૂતોને શાકભાજીના ઉત્પાદનનું યોગ્ય વળતર મળી રહે તે માટે આ નિર્ણય લેવામાં આવ્યો છે.

પ્રધાનમંત્રી કિસાન સંપદા યોજના હેઠળ સહકારી દૂધ બ્રાન્ડ(મધુર ડેરી) અને બાગાયત વિભાગ દ્વારા દૂધની સાથો સાથ ખેતીના વ્યવસાય સાથે જોડાયેલ પશુપાલકો અને ખેડૂતોને દૂધની જેમ ખેતઉત્પાદનોમાં પણ ભાવ મળી રહે તે માટે એક પહેલની શરૂઆત કરવામાં આવી છે. જેમાં ફળ શાકભાજી અને મિનરલ વોટર મળી રહે તે માટે વિવિધ પ્રોજેક્ટની શરૂઆત કરવામાં આવી રહી છે.

મહત્વનું છે કે આ પ્રકારનો નિર્ણય ગ્રાહકો માટે ઉત્તમ પ્રકારનો નિવડી શકે છે. ત્યારે મધુર ડેરી અને ગાંધીનગર જિલ્લા બાગાયત વિભાગના આ નિર્ણયથી હવે દૂધની માફક શાકભાજી પણ ઘર આંગણે અને સહકારી ધોરણે ઉપલબ્ધ થઇ શકશે.