આ વખતે આઇપીએલમાં પહેલી વાર ઇમ્પેક્ટ પ્લેયરનો નિયમ જોવા મળશે. આ નિયમ પ્રમાણે ટીમોએ ટોસ સમયે પ્લેઇંગ ઈલેવન ઉપરાંત પોતાના અન્ય ચાર ખેલાડી વિકલ્પના રૂપમાં પસંદ કરવા પડશે.
આઇપીએલ સિઝનમાં પહેલી વાર ઇમ્પેક્ટ પ્લેયરનો ઉપયોગ કરવામાં આવશે
આઇપીએલ-૨૦૨૩માં પહેલી વાર બે મીડિયા પાર્ટનર્સ હશે
આઇપીએલના મિની ઓક્શનમાં સૌથી મોંઘા ખેલાડી ખરીદવાનો રેકોર્ડ
આઇપીએલ દરેક વખતે પોતાની સાથે કંઈક નવું લઈને આવે છે. આ વખતે ૧૬મી સિઝનમાં પણ ઘણું એવું નવું હશે, જેને જોવા માટે ચાહકો ઘણા ઉત્સાહિત છે. આ સિઝનમાં પહેલી વાર ઇમ્પેક્ટ પ્લેયરનો ઉપયોગ કરવામાં આવશે, જ્યારે આ વખતે આઇપીએલ હોમ અને અવેના પોતાના જૂના ફોર્મેટમાં રમાશે, જેમાં ટીમ એક મેચ પોતાના હોમગ્રાઉન્ડ પર અને એક મેચ બહારનાં મેદાન પર રમશે.
IPLના બે મીડિયા પાર્ટનર્સઃ આઇપીએલ-૨૦૨૩માં પહેલી વાર બે મીડિયા પાર્ટનર્સ હશે. ૨૦૨૩થી ૨૦૨૭ દરમિયાન એશિયામાં આઇપીએલના બે પાર્ટનર્સ હશે, જેમાં સ્ટાર ઇન્ડિયા અને Vioacom18ની સાથે ટાઇમ્સ ઇન્ટરનેટ પણ હશે. Vioacom18 અને ટાઇમ્સ ઇન્ટરનેટે રૂ. ૨૩,૭૫૮ કરોડમાં આઇપીએલના ડિજિટલ રાઇટ્સ ખરીદ્યા છે, જ્યારે સ્ટાર ઇન્ડિયાએ ૨૩,૫૭૫ કરોડમાં બ્રોડકાસ્ટિંગ રાઇટ્સ ખરીદ્યા છે.
ઈમ્પેક્ટ પ્લેયરનો નિયમઃ આ વખતે આઇપીએલમાં પહેલી વાર ઇમ્પેક્ટ પ્લેયરનો નિયમ જોવા મળશે. આ નિયમ પ્રમાણે ટીમોએ ટોસ સમયે પ્લેઇંગ ઈલેવન ઉપરાંત પોતાના અન્ય ચાર ખેલાડી વિકલ્પના રૂપમાં પસંદ કરવા પડશે. ટીમ આમાંથી કોઈ પણ એક ખેલાડીને ઇમ્પેક્ટ પ્લેયરના રૂપમાં પસંદ કરી શકશે. બંને ટીમ મેચની ઇનિંગ્સની ૧૪મી ઓવર સુધી ઇમ્પેક્ટ પ્લેયરને મેદાનમાં ઉતારી શકશે. જે ખેલાડીના બદલે બીજો ખેલાડી મેદાનમાં આવશે તો મેદાનની બહાર જનારો ખેલાડી ત્યાર બાદ મેચમાં પાછો આવી શકશે નહીં. આ નિયમ ફક્ત ભારતીય ખેલાડીઓ માટે જ અમલી છે, વિદેશી ખેલાડીની મેચમાં અદલા-બદલી થઈ શકશે નહીં.
સેમ કરન, બેન સ્ટોક્સ અને ગ્રીન પર બધાની નજરઃ આ વખતે આઇપીએલના મિની ઓક્શનમાં સૌથી મોંઘા ખેલાડી ખરીદવાનો રેકોર્ડ બન્યો. પંજાબ કિંગ્સે ઇંગ્લિશ ઓલરાઉન્ડર સેમ કરનને રૂ. ૧૮.૫ કરોડની કિંમતમાં ખરીદ્યો. આ ઉપરાંત બેન સ્ટોક્સ અને કેમરૂન ગ્રીન પણ મોંઘા ખેલાડીઓની યાદીમાં સામેલ થયા. સ્ટોક્સને ચેન્નઈ સુપર કિંગ્સે રૂ. ૧૬.૨૫ કરોડમાં અને કેમરૂન ગ્રીનને મુંબઈ ઇન્ડિયન્સે રૂ. ૧૭.૫૦ કરોડમાં પોતાની ટીમમાં સામેલ કર્યા. આ ત્રણેય મોંઘાદાટ ખેલાડીઓનાં પ્રદર્શન પર બધાની નજર રહેશે.
આ ભારતીય દિગ્ગજો પર પણ બધાની નજર રહેશેઃ આ વર્ષે રમાનારી આઇપીએલમાં મહેન્દ્રસિંહ ધોની, વિરાટ કોહલી અને રોહિત શર્મા પર નજર ક્રિકેટ ચાહકોની નજર રહેશે. ધોની કદાચ છેલ્લી વાર આઇપીએલમાં રમતો નજરે પડશે. આ ઉપરાંત ગત સિઝનમાં નિષ્ફળ રહેલા રોહિત શર્મા અને વિરાટ કોહલી પર પણ નજર રહેશે.
હોમ એન્ડ અવે ફોર્મેટઃ આગામી સિઝનમાં હોમ એન્ડ અવે ફોર્મેટ અંતર્ગત મેચ રમાશે. આ ફોર્મેટ પ્રમાણે ટીમ પોતાની એક હોમગ્રાઉન્ડમાં અને એક મેચ બહાર રમશે. કોરોનાને કારણે લાંબા સમય બાદ આ ફોર્મેટની વાપસી થઈ છે. કોવિડ બાદ ૨૦૨૦ની સિઝન દુબઈમાં રમાઈ હતી, ત્યાર બાદ ૨૦૨૧માં આઇપીએલ માત્ર દિલ્હી, અમદાવાદ, મુંબઈ અને ચેન્નઈમાં જ રમાઈ હતી. જ્યારે ૨૦૨૨ની સિઝન પણ ચાર મેદાનમાં જ રમાઈ હતી, જેમાં મહારાષ્ટ્રનાં કુલ ચાર સ્ટેડિયમ સામેલ રહ્યાં હતાં.
જૂના ખેલાડીઓ નજરે પડશેઃ આ વખતની આઇપીએલમાં સ્પિનર અમિત મિશ્રા અને પીયૂષ ચાવલા જોવા મળશે. ૪૦ વર્ષીય અમિત મિશ્રાને રૂ. ૫૦ લાખ ચૂકવીને લખનૌ સુપર જાયન્ટ્સે પોતાની ટીમમાં સામેલ કર્યો છે. જ્યારે ૩૪ વર્ષીય ચાવલાને આ વખતે મુંબઈ ઇન્ડિયન્સે ૫૦ લાખ ચૂકવીને ખરીદ્યો છે. બંનેનાં પ્રદર્શન પર બધાની નજર રહેશે.