ગંભીરા સ્થિત મંડળીની તમાકુની જાહેર હરાજીમાં ખેડૂતોને ગત વરસ કરતાં 20 થી 24 ટકા ભાવ વધારે મળતા રાજીના રેડ. ગત વરસે રૂ. 2799 સામે ચાલુ વરસે રૂ. 3490 મળતાં ખેડૂતોની ખુશી અપાર
ચરોતરની તમાકુના હરાજીમાં કાચા સોના જેવા ભાવ
ઉચા દામ મળવાથી ખેડૂતો ખુશહાલ, હવે મોટી આશા
ભાઠા મંડળીની હરાજીથી ખેડૂતો થયા રાજીના રેડ
તમાકુની ખેતીને લઇને ચરોતર પ્રદેશ જગ ખ્યાત છે, તેમાંય ભાઠાની તમાકુ ઉચ્ચ ગુણવત્તાસભર હોવાથી દર વરસે ખરીદી માટે ભારોભાર ઉત્સાહ ચર્શાવાય છે. ગંભીરા સ્થિત મંડળીએ રવિવારે તમાકુની જાહેર હરાજી યોજી હતી. જેમાં ખેડૂતોને ગત વરસ કરતાં 20 થી 24 ટકા ભાવ વધારે મળતા રાજીના રેડ થઇ ગયા હતા. ગત વરસે રૂ. 2799 સામે ચાલુ વરસે 3490 જેટલા મળતાં ખેડૂતોની ખુશીઓનો પાર નહોતો રહ્યો. આ હરાજી બાદ હવે જિલ્લાભરના તમાકું ઉત્પાદન કરતા ખેડૂતોને પણ મોટી આશા નવા ભાવ વધારાની બંધાઈ છે.અને એ બહ્યું સાહજિક છે.
ચરોતરના ગંભીરા ભાઠા મંડળીના પ્રમુખ દિપક પટેલ સહીત અન્ય સદસ્યોની ઉપસ્થિતિમાં રવિવારે તમાકુની હરાજી યોજાઈ હતી. હરાજી પૂર્વે જ અનેક વેપારીઓએ બંધ કવરમાં તમાકુના ભાવ ભર્યા હતા. આ ભાવ ભરેલા બંધ કવરને ખેડૂતો અને વેપારીની ઉપસ્થિતિમાં જ ખોલવામાં આવતા ચાલુ વર્ષે તમાકુના ભાવ અત્યાર સુધીની સરખામણીએ સૌથી ઊંચા જોવા મળ્યા. ગત વર્ષે તમાકુના ભાવ પ્રતિ મણ 2799 રૂપિયા હતાં. જે રવિવારની હરાજીમાં આ ભાવ રૂપિયા 3490 જાહેર થયા છે.
સામાન્ય રીતે ગંભીરા ભાઠાની તમાકુના ભાવ જાહેર થયા બાદ ચરોતર જિલ્લાના અન્ય પંથકના તમાકુના ભાવ જાહેર થતા હોય છે. ચાલુ વર્ષે ચરોતરના અન્ય વિસ્તારની તમાકુના ભાવ પણ ઊંચા જાય તેવી આશા તમાકું પકાવતા ખેડૂતોને બંધાઈ છે.
ચરોતર પંથકમાં તમાકું ઉત્પાદન વ્યવસાય સાથે સંકળાયેલા વેપારીઓ કહે છે કે, મોટા ધોવાણો બાદ હવે 500 એકર જેવી જમીન જ આ પંથકમાં બચી છે. જે ખેડૂતોએ ચાલુ વરસે તમાકુનું રોપણ કર્યું હતું તેઓને અગાઉના વરસો કરતાં ઘણો ફાયદો રહ્યો, અગાઉ પૂર સહિતની અતિવૃષ્ટિ જેવી સમસ્યાથી પાક ધોવાતો આવતો હતો. આ પરિણામે ખર્ચનું ભારણ વધતું ચાલ્યું હતું. ત્યારે સામે પક્ષે ભાવ ઓછા મળવાની પરિસ્થીતિ પણ ખેડૂતોએ વેઠી છે. આ વખતે એક જ રોપણમાં તમાકુનું મબલક ઉત્પાદન થયું અને ઉચ્ચ ગુણવત્તાનો સારો એવો પાક પણ ઉતર્યો ખેડૂતોને જે પ્રમાણે બજાર ભાવની આશા હતી કદાચ તે જ પ્રમાણેના ઊંચા દામ મળતા હવે અન્ય વિસ્તારનાં તમાકુના ભાવમાં પણ 'બમ્પર' જોવા મળશે.તેવી આશા હરકોઈ વ્યાપારીને છે.