AGR વિવાદ / ટેલિકોમ સંકટ વચ્ચે એરટેલના ગ્રાહકો માટે આવ્યા સારા સમાચાર; કંપનીએ ચૂકવી દીધા આટલા રૂપિયા

• વોડાફોનની સરખામણીમાં એરટેલ લેણાં ચૂકવવા વધુ સક્ષમ
• કંપનીના સ્વમૂલ્યાંકન અને ટેલિકોમ ડિપાર્ટમેન્ટના દાવાની રકમ વચ્ચે તફાવત 

એરટેલ પાસે 5 અબજ ડોલર ચૂકવવાની ક્ષમતા 

તાજેતરમાં જ રેટિંગ એજન્સી મૂડીઝે કહ્યું હતું કે ખાનગી ક્ષેત્રની ટેલિકોમ કંપની ભારતી એરટેલ પાસે 5 અબજ ડોલરના કાયદાકીય લેણાં ચૂકવવાની આર્થિક ક્ષમતા છે. આ મહિનાની શરૂઆતમાં સુપ્રીમ કોર્ટે ટેલિકોમ કંપનીઓને 24 ઓક્ટોબર 2019 ના તેના નિર્ણયનું પાલન કરવાનું કહ્યું હતું. સુપ્રીમ કોર્ટે તેના ચુકાદામાં દૂરસંચાર વિભાગની એડજસ્ટેડ ગ્રોસ રેવન્યુ (AGR) ની વ્યાખ્યાને યોગ્ય ઠેરવી હતી.

17 માર્ચ સુધી સમગ્ર પેમેન્ટ કરવાનું છે પૂર્ણ 

મૂડીઝે કહ્યું કે 35,300 કરોડ રૂપિયાની ચુકવણીથી ભારતી એરટેલની આર્થિક હાલત ઉપર ખાસ અસર નહીં થાય. વર્તમાન રેટિંગમાં તેની સ્થિતિ સંતોષકારક રહેશે. એરટેલે 17 માર્ચ સુધીમાં તેના અગાઉના લેણાંની પૂર્ણ ચુકવણી કરવાની રહેશે. આ અગાઉ ભારતી એરટેલે AGR લેણાંમાંથી 10,000 કરોડ રૂપિયા સરકારમાં જમા કરાવ્યા હતા. રેટિંગ એજન્સીએ જણાવ્યું હતું કે કંપનીની તાજેતરની મૂડી વધારવાની પ્રવૃત્તિઓ તેને AGR માટેની ચૂકવણી માટે મદદરૂપ થશે.

કંપનીઓ સ્વમૂલ્યાંકન દસ્તાવેજ જમા કરાવ: સરકારની તાકીદ 

ટેલિકમ્યુનિકેશન્સ વિભાગના સૂત્રોએ જણાવ્યું હતું કે આ દસ્તાવેજોના આધારે કંપનીઓને બાકી એડજસ્ટેડ ગ્રોસ રેવન્યુ (AGR) ની ગણતરી કરવામાં મદદ મળશે.

નોંધપાત્ર વાત એ છે કે, કંપનીઓએ સરકારને કહ્યું હતું કે ટેલિકમ્યુનિકેશન્સ ડિપાર્ટમેન્ટ દ્વારા નક્કી થયેલ AGRની બાકી રકમ અને તેમના સ્વમૂલ્યાંકન દસ્તાવેજની રકમ વચ્ચે મોટો તફાવત છે. હવે સરકારે ત્રણેય ટેલિકોમ કંપની ભારતી એરટેલ, વોડાફોન આઈડિયા અને ટાટા ટેલિસર્વિસિસને આ દાવાની પુષ્ટિ અંગેના દસ્તાવેજો રજૂ કરવા જણાવ્યું છે.

વોડાફોન આઈડિયાની આટલી રકમ બાકી 

વોડાફોન આઈડિયા વિશે વાત કરીએ તો કંપનીએ 20 ફેબ્રુઆરીએ AGR લેણાં માટે એક હજાર કરોડ રૂપિયા ટેલિકમ્યુનિકેશન્સ વિભાગને ચૂકવ્યા હતા. આ પહેલા 17 ફેબ્રુઆરી 2020 માં કંપનીએ 2,500 કરોડ રૂપિયા જમા કરાવ્યા હતા. હવે વોડાફોન આઈડિયાના 49,538 કરોડ રૂપિયા બાકી છે. જ્યારે અગાઉ આ રકમ 53,038 કરોડ રૂપિયા હતી.

શું છે AGR?

ટેલિકોમ કંપનીઓએ સ્પેક્ટ્રમ વપરાશ ચાર્જ (એસયુસી) અને લાઇસન્સ ફી જેવા સ્પેક્ટ્રમ ફીના રૂપમાં આવકનો એક ભાગ સરકારને ચૂકવવો પડે છે. ટેલિકોમ કંપનીઓનો ડિપાર્ટમેન્ટ ઓફ ટેલિકમ્યુનિકેશન્સ (ડીઓટી) સાથે લાઇસન્સ કરાર હોય છે. આ કરારમાં એજીઆર સાથે સંકળાયેલ શરતો શામેલ હોય છે. ટેલિકોમ કંપનીઓને સરકારને એજીઆરની ત્રણ ટકા સ્પેક્ટ્રમ ફી અને આઠ ટકા લાઇસન્સ ફી ચૂકવવાની હોય છે જે આ કંપનીઓની ચૂકવવાની બાકી છે.