અમદાવાદ : હવામાન વિભાગે દેશભરમાં વરસાદની આગાહી કરી છે. આ વર્ષે દેશભરમાં સારો વરસાદ આવે તેવી હવામાન વિભાગે આગાહી કરી છે. કેરળમાં 1 જૂન સુધીમાં ચોમાસુ આવે તેવી શક્યતા છે. જ્યારે રાજસ્થાન સહિતના દેશના અનેક ભાગોમાં સપ્ટેમ્બર સુધી ભરપૂર વરસાદ આવી શકે છે.
દેશના 26 કરોડથી વધુ ખેડૂતો ડાંગર, શેરડી, મકાઈ, કપાસ, સોયાબિન જેવા પાક માટે સારા વરસાદની રાહ જોઈ રહ્યા છે. ત્યારે હવે હવામાન વિભાગની આગાહી થતા ખેડૂતોમાં પણ ખુશીનો માહોલ જોવા મળ્યો છે.
હવામાન વિભાગે કહ્યું છે કે, આ વર્ષે જબરદસ્ત ચોમાસું રહેશે. પહેલા એવી આશા હતી કે અલનીનોને કારણે ચોમાસું નબળું થઈ શકે છે. એશિયાના ત્રીજા સૌથી મોટા અર્થતંત્ર માટે ચોમાસું અત્યંત મહત્ત્વનું છે. કેરળમાં તા.1 જૂન સુધીમાં ચોમાસું આવી જશે તેમ મનાય છે.
મહત્વનું છે કે માર્ચ મહિનો ચાલી રહ્યો છે છતાં પણ હજુ ઠંડીનો અહેસાસ લોકોને થઇ રહ્યો છે. રાજ્યભરમાં સવારે અને રાત્રે વાતાવરણ બિુલકુલ ઠંડુ રહે છે અને હજુ પણ થોડાં દિવસ ઠંડી યથાવત રહે તેવી શક્યતા છે અને 2થી 4 દિવસ વાદળછાયું વાતાવરણ રહેશે. જો કે આગામી એક સપ્તાહમાં ગરમીનું જોર વધી શકે છે અને તાપમાનમાં 4થી 6 ડિગ્રીનો વધારો થઇ શકે છે.