અમેરિકા અને ઇરાન વચ્ચે તણાવ વધતાં સોના-ચાંદીના ભાવમાં વધુ ઉછાળો આવ્યો હતો અને સોનાના ભાવ ઊછળીને પ્રતિ ૧૦ ગ્રામદીઠ રૂ.૪૧,૦૦૦ની ઉપર નવા ઊંચા શિખરે પહોંચતાં લોકલ અમદાવાદના સોની બજારમાં ચિંતા પ્રસરી છે.
સોના-ચાંદીના ભાવમાં જોવા મળ્યો વધુ ઉછાળો
નવા ઊંચા શિખરે પહોંચતાં સોની બજારમાં ચિંતા પ્રસરી
મેરેજ સિઝનમાં સોનાની ખરીદીમાં કાપ મૂકે તેવી શક્યતા
સોના પાછળ ચાંદીની ચમક પણ વધી છે અને પ્રતિ કિગ્રાદીઠ ભાવ રૂ.૪૯,૦૦૦ને વટાવી ગયો છે. આગામી દિવસોમાં પણ સોનાના ભાવમાં વધારો થાય તેવી પૂરી સંભાવના છે, જેના કારણે લોકો આવી રહેલી મેરેજ સિઝનમાં સોનાની ખરીદીમાં કાપ મૂકે તેવી શક્યતા છે.
એક જ દિવસમાં સોનું દસ ગ્રામના ભાવ ૪૧ હજારની સપાટી વટાવી જતાં સ્થાનિક બજારમાં સન્નાટો વ્યાપ્યો છે. એક જ દિવસમાં બજારને કરોડો રૂપિયાની નુકસાની થઇ ગઇ હોવાનું બજારનાં સૂત્રો જણાવે છે. રિટેલ માર્કેટને તો આ ફટકાની કળ ક્યારે વળશે એ કહેવું હાલ મુશ્કેલ બની ગયું છે. હોલસેલ માર્કેટમાં પણ ઊભા સોદામાં ઝવેરીઓને મોટી નુકસાની આવી છે.
હોલસેલ માર્કેટનાં સૂત્રોના જણાવ્યા મુજબ બજારમાં પેનિકના કારણે સૌથી વધુ મોટી વિશ્વાસની કટોકટી સર્જાશે. બજાર ચાલશે કે નહીં તે ચિંતામાં રિટેલ માર્કેટ અને સેમી હોલસેલ માર્કેટ હોલસેલમાંથી સોનું ખરીદવાનું બંધ કરશે અથવા ખૂબ જ ઓછી ખરીદી કરશે. ભાવમાં વધારો હોવાના કારણે લોકો માત્ર શુકન પૂરતું જ સોનું ખરીદવાનું પસંદ કરશે. લગ્ન પ્રસંગની ખરીદીમાં પણ બજેટ પ્રમાણે ખરીદીમાં કાપ મુકાશે.