લૉકડાઉન-3માં સોના-ચાંદીના ભાવમાં મોટો ઘટાડો નોંધાયો છે. મંગળવારે સોનાના ભાવમાં 170 રૂપિયાના ઘટાડા સાથે 45743 રૂપિયા પ્રતિ 10 ગ્રામ થયાં હતા. આ તરફ ચાંદીના ભાવમાં 590 રૂપિયાના ઘટાડો નોંધાયો હતો.
લૉકડાઉન-3 વચ્ચે સોના-ચાંદીના ભાવમાં ઘટાડો
સોનામાં 170 રૂપિયા ઘટ્યા
ચાંદીમાં 590 રૂપિયાનો ઘટાડો
આ પહેલા સોમવારે સોનાના ભાવ 180 રૂપિયા વધીને 45913 પ્રતિ 10 ગ્રામ થયાં હતા. તો સોમવારે ચાંદીના ભાવ 900 રૂપિયાના ઘટાડા સાથે સસ્તી થઇ હતી.
કેટલો છે ભાવ
ઇન્ડિયા બૂલિયન એન્ડ જ્વેલર્સ એસોશિયેશનની વેબસાઇટ www.ibja.co અનુસાર 5 મે 2020ના રોજ 24 કેરેટ ગોલ્ડ 170 રૂપિયા પ્રતિ 10 ગ્રામથી ઘટીને 45,743 પર પહોચ્યા હતા.
જ્યારે 22 કેરેટ ગોલ્ડ 155 રૂપિયા ઘટીને 44,040 રૂપિયા પ્રતિ 10 ગ્રામ પહોંચ્યા હતા. આ જ રીતે ચાંદીના ભાવમાં 590 રૂપિયાના ઘટાડા સાથે કિલોના ભાવ 40,710 રૂપિયા થયાં હતા.
કેમ થયો ભાવમાં ઘટાડો
નોંધપાત્ર વાત એ છે કે લોકડાઉનને કારણે, દેશના મોટાભાગના મહત્વના શહેરોમાં રેડ ઝોન છે જ્યાં સોનામાં કોઈ હાજર વેપાર નથી, પરંતુ ઈન્ડિયા બુલિયન એન્ડ જ્વેલર્સ એસોસિએશનની વેબસાઇટ તમામ કેન્દ્રો પાસેથી દર લઈને સરેરાશને જાહેર કરે છે.
આ તરફ મંગળવારે વાયદા બજારમાં સોનામાં નરમાઈ આવી છે. અમેરિકા અને ચીન વચ્ચે વેપાર યુદ્ધ શરૂ થવાની સંભાવના વધી ગઈ છે. જેના કારણે સોનાના ભાવમાં ઉતાર-ચઢાવ જોવા મળી રહ્યો છે. મલ્ટી કોમોડિટી એક્સચેંજ પર જૂન વાયદાના કરાર માટે સોનાનો દર 10 ગ્રામના રૂ .45,460 પર પહોંચી ગયો છે. એ જ રીતે ચાંદીનો વાયદો દર કિલોદીઠ રૂ. 41,122 પર પહોંચી ગયો છે.
ઇન્ટરનેશનલ માર્કેટના ભાવ
આંતરરાષ્ટ્રીય બજારમાં સોનાના ભાવ 1700 ડોલર પ્રતિ ઔંસ પર યથાવત છે. કોમેક્સ પર ગોલ્ડ આશરે 1705 ડોલર પ્રતિ ઔંસ ચાલી રહ્યા છે. કેટલાય મોટા દેશમાં આર્થિક આંકડા નિરાશાજનક રહ્યા છે અને અમેરિકા-ચીન વચ્ચે પણ દિવસેને દિવસે તણાવ વધી રહ્યો છે. તેના કારણે સોનાના ભાવમાં ઘટાડો નોંધાયો છે.