કોમોડિટી / સોના-ચાંદીની કિંમતોમાં જોવા મળી રેકોર્ડબ્રેક તેજી, પહેલી વાર જોવા મળ્યો સોનાનો આટલો ભાવ

MCX પર ઓગસ્ટ ગોલ્ડ ફ્યૂચરની કિંમતમાં 1 ટકા એટલે કે 493 રૂપિયાનો વધારો જોવા મળ્યો, ત્યારબાદ સોનાની કિંમત સવારે 50,020 રૂપિયા પર પહોંચી ગઇ. સપ્ટેમ્બરમાં ચાંદી ફ્યૂચર રેટમાં છ ટકાનો વધારો થયો, ત્યારબાદ કિંમત 57,342થી વધીને 60,782 રૂપિયા પર પહોંચી ગયો છે.

MCX પરગોલ્ડ ફ્યૂચર 0.99 ટકાની તેજી સાથે 50,017 રૂપિયાના વાયદા પર વેપાર કરી રહ્યો હતો. જ્યારે ચાંદીમાં ફ્યૂચરની અંદર 5.71 ટકાની તેજી જોવા મળી, ત્યારબાદ ચાંદીનો ફ્યૂચર ભાવ 60,619 પર જોવા મળી રહ્યો હતો. 

દુનિયાભરમાં કોવિડ-19ના કહેર વચ્ચે છેલ્લા કેટલાંક અઠવાડિયામાં સોના-ચાંદીની કિંમતોમાં ઘણી તેજી જોવા મળી છે. સામાન્ય રીતે અનિશ્ચિતતાના વાતાવરણમાં રોકાણકારો કોઇ જોખમભર્યા વિકલ્પોમાંથી સોના તરફ દોટ મુકતા હોય છે.

દેશમાં લોકડાઉનની વચ્ચે સ્થાનિક માર્કેટમાં સોનાની માગમાં ઘટાડો નોંધાયો છે, જો કે સોનાની કિંમતમાં વધારો જોવા મળ્યો છે. પરંતુ હાલમાં પીળી ધાતુના કિંમતોમાં મોંઘવારી આવવાના કારણે રિટેલ માર્કેટમાં સોનાની માંગ સુસ્ત જોવા મળી રહી છે. 

આંતરરાષ્ટ્રીય માર્કેટમાં કમજોર ડૉલર અને મહામારીથી બચાવવા માટે માર્કેટને રાહત આપવાની આશા વચ્ચે બુધવારે સોનું એક ટકો ઉછળી નવ વર્ષના સૌથી ઉપરના સ્તર પર પહોંચી ગયો. સ્પૉટ ગોલ્ડ 0.8 ટકાની તેજી સાથે 1,856.13 ડોલર પ્રતિ ઔંસના રેટ પર ટ્રેડ કરી રહ્યો હતો. આ પહેલા તેમાં ,1865.35 ડોલર પ્રતિ ઔંસનો આંકડો જોવા મળ્યો હતો, જે સપ્ટેમ્બર 2011 બાદનો સૌથી ઉપરી સ્તર છે.