Gold Price / 5 મહિના બાદ 50 હજારથી નીચે આવ્યો સોનાનો ભાવ, જાણો કેવા છે ચાંદીના હાલ

• સૌથી નીચે સ્તરે પહોંચ્યુ સોનું 
• ફેબ્રુઆરી બાદ સૌ પ્રથમ 50 હજારની નીચે 
• જાણો આજના લેટેસ્ટ ભાવ 

વૈશ્વિક બજારમાં સોનાના ભાવમાં થયેલા મોટા ઘટાડાની અસર ગુરુવારે ભારતીય વાયદા બજાર પર પણ જોવા મળી હતી અને સોનાની કિંમત લગભગ એક વર્ષની નીચી સપાટીએ પહોંચી ગઈ હતી. ચાંદીમાં પણ આજે 400 રૂપિયાથી વધુનો ઘટાડો જોવા મળી રહ્યો છે.

મલ્ટીકોમોડિટી એક્સચેન્જ (MCX) પર આજે સવારે 24 કેરેટ શુદ્ધતાના સોનાના વાયદોનો ભાવ આજે રૂ. 250 ઘટીને રૂ. 49,958 પ્રતિ 10 ગ્રામ પર આવી ગયો. અગાઉ સોનામાં 50 હજારના સ્તરે ટ્રેડિંગ શરૂ થઈ હતી. પરંતુ વૈશ્વિક બજારમાં માંગમાં મંદી અને ઘટાડાને કારણે ટૂંક સમયમાં જ વાયદાના ભાવ 50 હજારની નીચે પહોંચી ગયા હતા. સોનું હાલમાં તેના છેલ્લા બંધ ભાવ કરતાં લગભગ 0.5 ટકાના ઘટાડા પર ટ્રેડ થઈ રહ્યું છે.

ચાંદીમાં પણ મોટો ઘટાડો
સોનાની જેમ આજે ચાંદીના વાયદાના ભાવમાં પણ મોટો ઘટાડો જોવા મળી રહ્યો છે. એમસીએક્સ પર, ચાંદીની વાયદાની કિંમત સવારે રૂ. 480 ઘટીને રૂ. 55,130 પર આવી હતી. અગાઉ ચાંદીમાં 55,450 રૂપિયાના સ્તરે ટ્રેડિંગની શરૂઆત થઈ હતી. પરંતુ ટૂંક સમયમાં જ વૈશ્વિક બજારનું દબાણ દેખાવા લાગ્યું હતું. ચાંદી હાલમાં તેના પાછલા બંધ ભાવથી 0.88 ટકાના ઘટાડા પર ટ્રેડ કરી રહી છે.

વૈશ્વિક બજારમાં કિંમતો એક વર્ષની નીચી સપાટીએ 
વૈશ્વિક બજારમાં આજે સોનાની કિંમતમાં મોટો ઘટાડો જોવા મળી રહ્યો છે અને તેની કિંમત લગભગ એક વર્ષના નીચલા સ્તરે પહોંચી ગઈ છે. યુએસ માર્કેટમાં હાજર સોનાની કિંમત આજે સવારે 1,691.40 ડોલર પ્રતિ ઔંસ હતી.

જે ઓગસ્ટ 2021 પછીનું સૌથી નીચું સ્તર છે. સોનું હાલમાં તેના અગાઉના બંધ ભાવ કરતાં 0.20 ટકા નીચું ટ્રેડ થઈ રહ્યું છે. વૈશ્વિક બજારમાં ચાંદીનો હાલનો ભાવ પણ આજે ઘટીને 18.62 ડોલર પ્રતિ ઔંસ થયો હતો. જે અગાઉના બંધ ભાવ કરતાં 0.39 ટકા ઓછો છે.