ઘટાડો / સોનાના ભાવ ગગડ્યા, ચાંદી થઇ 2500 રૂપિયા સસ્તી; જાણો લેટેસ્ટ ભાવ

અમેરિકામાં રાહત પેકેજ ન બની શકવાના સમાચાર ફેલાતા સ્થાનિક વાયદાના બજારમાં સોનાની કિંમતોમાં ઝડપથી ઘટાડો થયો. આ દરમિયાન ચાંદી 2500 રૂપિયા પ્રતિ કિગ્રા જેટલી સસ્તી થઇ ગઈ. આ તરફ નિષ્ણાતોનું કહેવું છે કે 10 ગ્રામ સોનાના ભાવ થોડા દિવસોમાં ઘટીને 50,000 રૂપિયાની નીચે આવી જઈ શકે છે. 

સતત બીજા દિવસે સોનાની કિંમતોમાં ઘટાડો

અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ડેમોક્રેટ્સની સાથે મળીને રાહત પેકેજની યોજના પડી ભાંગ્યા બાદ સતત બીજા દિવસે સોનાની કિંમતોમાં ઘટાડો થયો હતો. બુધવારે ડિસેમ્બરના સોનાના વાયદાના ભાવમાં 470 રૂપિયાના કડાકા સાથે 10 ગ્રામનો ભાવ 50,088 થઇ ગયો હતો. 

ગોલ્ડ ETFમાં SPDR ગોલ્ડ ટ્રસ્ટનું હોલ્ડિંગ મંગળવારે 0.32% ઘટીને 1271.51 ટન થઇ ગયું

દુનિયાના સૌથી મોટા ગોલ્ડ એક્સચેન્જ ટ્રેડેડ ફંડ અથવા ગોલ્ડ ETFમાં SPDR ગોલ્ડ ટ્રસ્ટનું હોલ્ડિંગ મંગળવારે 0.32% ઘટીને 1271.51 ટન થઇ ગયું. વિશ્લેષકો માને છે કે ભારતમાં સોનાની માંગ તહેવારોની સીઝનમાં વધશે જેથી ભાવમાં વધારો થઇ શકે છે. 

સોનાના ભાવ 1 અઠવાડિયાના સૌથી નીચલા સ્તરે આવી ગયા છે. ભારતમાં ગોલ્ડનો ઈમ્પોર્ટ સપ્ટેમ્બરમાં 59 ટકા સુધી ઘટ્યો છે. આ તરફ ચાંદી 2 અઠવાડિયાના તળિયે પહોંચી છે.