કોમોડિટી / શેરબજારમાં વધઘટ પણ સોના-ચાંદીના ભાવને લઇને આવ્યા સારા સમાચાર, જાણો શું

• શેરબજારમાં બે તરફી મોટી વધઘટ આવી શકે છે
• ચાંદીમાં મોટી નરમાઈ જોવા મળી શકે છે
• શેરબજારમાં ભલે વધઘટ થાય પરંતુ સોનાના ભાવમાં થશે ઘટાડો 

આ સપ્તાહના મહત્વના યોગો

આ સપ્તાહના મહત્વના યોગોમાં બુધ અને રાહુનો ત્રિકોણ યોગ બને છે અને બુધ અને હર્ષલનું ક્રાંતિસામ્ય થાય છે. ગુરુ, શનિ સ્વગૃહી છે અને શુક્ર પોતાની ઉચ્ચ રાશિમાં ભ્રમણ કરે છે.

શેરબજાર 

મિત્રો, આ સપ્તાહના ગ્રહયોગનો અભ્યાસ કરતાં શેરબજારમાં સપ્તાહની શરૂઆત બજેટની અસરોથી થશે. શરૂઆતના દિવસે બજાર મજબૂત ખૂલી મજબૂત રહે. બજારમાં સપ્તાહની શરૂઆતથી જ દરેક ભાવે વેચવું હિતાવહ છે. આ સપ્તાહના મધ્યના દિવસો સુધી બજારમાં વેચીને વેપાર કરી શકાય. ગ્રહયોગ જોતાં આ દિવસોમાં મેટલ, રિલાયન્સ, બેન્ક સેક્ટરમાં વધઘટ વધુ આવી શકે છે. 

આ સપ્તાહના મધ્યના દિવસોમાં બજારમાં વેચવાલી આવે તેવા યોગો છે. આ દિવસોમાં એકાદ દિવસ ઝડપી વેચવાલી આવી શકે છે. સપ્તાહના અંતિમ દિવસોમાં પણ બજારમાં નરમ ધ્યાન રાખીને વેપાર કરવો. આ દિવસો બજારમાં સાંકડી વધઘટ અથવા બે તરફી વધઘટ જોવા મળી શકે છે. આ દિવસોના અંતિમ દિવસે બજારમાં વેચવાલી આવી શકે છે.
એકંદરે શેરબજારમાં બજેટની અસર હોવાથી મોટી વધઘટ બંને સાઇડની આવી શકે છે. માટે નફો બુક કરતાં રહેવું. દરેક ઊંચા મથાળે વેચીને વેપાર કરવાથી સારો લાભ મેળવી શકાય.

સોના-ચાંદી 

આ સપ્તાહના ગ્રહયોગો જોતાં સોના-ચાંદીમાં નરમાઇ આવે તેમ હોવાથી તે વેચીને વેપાર કરનારને લાભ મળી શકે છે. આ સપ્તાહની શરૂઆતના દિવસથી બજારમાં વેચીને વેપાર સોના અને ચાંદીમાં ગોઠવતા જવો પણ દરેક ભાવે વેચી શકાય તેવી રીતે વેપાર કરવો. આ દિવસોમાં ચાંદીમાં વેચવાલી વધુ આવી શકે એવા યોગો હોવાથી ચાંદી વેચવાલી કરવી વધુ હિતાવહ છે. સપ્તાહના મધ્યના દિવસોમાં બજારમાં ચાંદીમાં મોટી વેચવાલી આવતાં સારા નરમ ભાવ બતાવી શકે છે. 

આ સપ્તાહમાં બજેટની અસર હોવાથી વધઘટ બંને સાઇડની બતાવી શકે છે. માટે નફો બુક કરતા જવો અને સપ્તાહના અંતિમ દિવસોમાં સોના અને ચાંદી બજાર બે તરફી વધઘટ બતાવી શકે છે, પણ મિત્રો, ધ્યાન નરમ રાખીને વેપાર કરવો. આ દિવસોમાં પણ એકાદ સારી વેચવાલી જોવા મળી શકે છે.

ક્રૂડ ઓઇલ 

આ સપ્તાહમાં પણ ક્રૂડ ઓઇલમાં સપ્તાહના ગ્રહો જોતાં નરમાઇ ભાવમાં બતાવી શકે છે, પણ આ ભાવમાં સ્ટોક કરતા જવો લાભદાયી રહે. આ સપ્તાહની શરૂઆતના દિવસથી જ ક્રૂડ ઓઇલમાં થોડો સ્ટોક કરવો હિતાવહ છે. સપ્તાહની શરૂઆતના દિવસોથી બજારમાં દરેક ભાવે સ્ટોક કરી શકાય તેવી રીતે વેપાર ગોઠવવો લાભદાયી રહે. શરૂઆતના દિવસથી સપ્તાહના મધ્યના દિવસો સુધી સ્ટોક વધારી શકો છો. સપ્તાહના મધ્યના દિવસોમાં એકાદ દિવસ સાંકડી વધઘટ રહેતી જોવા મળી શકે છે, પણ ધ્યાન મજબૂત રાખીને વેપાર કરવો. સપ્તાહના અંતિમ દિવસોમાં પણ બજારમાં નવી માગ નીકળતાં મજબૂત બજાર રહી શકે છે. ફોરેન માર્કેટમાં બજારમાં સારી તેજી આવતાં સ્થાનિક બજારમાં પણ મજબૂત ભાવ રહે. ફોરેન બજારની નવી ખરીદી નીકળતાં બજારમાં મજબૂત ભાવ જોવા મળી શકે છે.

એરંડા, તેલ, તેલીબિયાં 

આ સપ્તાહમાં એરંડા, દિવેલ, સિંગતેલ, કપાસિયા તેલ, તેલીબિયાંમાં મજબૂત ભાવ જોવા મળી શકે છે. સપ્તાહની શરૂઆતના દિવસે જ બજારમાં લેવાલી નીકળી શકે છે. આ સપ્તાહમાં તેલ, તેલીબિયાંમાં સપ્તાહની શરૂઆતના દિવસથી જ તેજી ધ્યાન રાખીને વેપાર કરતા જવો લાભદાયી રહી શકે છે. સપ્તાહની શરૂઆતના દિવસથી જ દરેક ભાવે સ્ટોક કરી શકીએ એવી રીતે વેપાર કરવો. સપ્તાહના મધ્યના દિવસો સુધી સ્ટોક વધારી શકાય. આ સપ્તાહમાં ભાવ જોઇને નફો બુક કરતા રહેવો, પણ આ દિવસોમાં પણ મંદીનો વેપાર કરવો નહીં. સપ્તાહના અંતિમ દિવસોમાં પણ તેલ, તેલીબિયાં, એરંડામાં મજબૂતીના જ યોગ હોવાથી સ્ટોક કરીને જ વેપાર કરવો લાભદાયી રહી શકે. આ સપ્તાહમાં એરંડા, તેલ, તેલીબિયાંમાં ભાવમાં મજબૂતી જોવા મળી શકે છે.

કપાસ-કોટન 

આ સપ્તાહની શરૂઆતમાં કોટન અને કપાસમાં તેજીના યોગો હોવાથી સપ્તાહની શરૂઆતના દિવસોથી જ કોટન-કપાસમાં સ્ટોક કરીને વેપાર કરવો લાભદાયી રહે. દરેક ભાવે શરૂઆતના દિવસોમાં સ્ટોક કરી શકીએ એવી રીતે સ્ટોક કરવો. આ દિવસોમાં એકાદ દિવસ નવી માગ નીકળતાં બજારમાં ભાવ ઉછાળો જોવા મળી શકે છે પણ ભાવ જોઇને નફો બુક કરતાં જવો. સપ્તાહના અંતિમ દિવસોમાં પણ બજારમાં મજબૂતીના જ યોગ છે. આ ભાવમાં મંદીનો વેપાર કરવો નહીં. એકંદરે આ સપ્તાહમાં કોટન-કપાસમાં તેજીના યોગ હોવાથી બજારમાં મજબૂતી જોવા મળી શકે છે. લાંબા સમય માટે સ્ટોક કરવો હોય તો આ સમયમાં કરી શકાય.

આલેખનઃ વિનોદ રાવલ