કોરોના મહામારી વિશ્વભરમાં ફેલાતી હતી તે સમયે સોનાના ભાવમાં વધારો થતો હતો. માર્ચથી ઓગસ્ટ દરમિયાન સોનાના ભાવમાં એકપક્ષી તેજી જોવા મળી હતી.
પરંતુ હવે કોરોના રસીના સમાચાર આવતાની સાથે જ સોનાનો ચમકારો લુપ્ત થઈ રહ્યો છે. ભારતીય શેર બજાર સોમવારે બંધ રહ્યું હોવા છતાં વૈશ્વિક બજારમાં સોમવારે સોનાના ભાવમાં ચાર વર્ષમાં સૌથી મોટો માસિક ઘટાડો જોવા મળ્યો હતો.
નવેમ્બરમાં અત્યાર સુધીમાં સોનાના ભાવમાં લગભગ 6 ટકાનો ઘટાડો
રસીના સમાચારોએ અર્થતંત્રમાં રિકવરીની આશાઓ ઉભી કરી છે જેના કારણે સોનાના ભાવ નીચે આવી રહ્યા છે. સોમવારે સ્પોટ ગોલ્ડ 1.2 ટકા ઘટીને 1766.26 ડોલર પ્રતિ ઔંસ પર બંધ થયું છે. નવેમ્બરમાં અત્યાર સુધીમાં સોનાના ભાવમાં લગભગ 6 ટકાનો ઘટાડો થયો છે. નવેમ્બર 2016 પછીનો આ સૌથી મોટો માસિક ઘટાડો છે.
તે જ સમયે આંતરરાષ્ટ્રીય બજારમાં 30 નવેમ્બરના રોજ ચાંદીના ભાવો પણ 3.2 ટકા તૂટ્યા અને 21.96 ડોલર પ્રતિ ઔંસ પર પહોંચી ગયા.
રસીના સમાચારોના કારણે લોકોમાં વેચવાલીનું પ્રમાણ વધ્યું
એક રીતે છેલ્લા 4 વર્ષમાં નવેમ્બર સોના માટે સૌથી ખરાબ મહિનો સાબિત થયો છે. કોરોના કટોકટીના કારણે લોકો સોનામાં રોકાણ કરવા તરફ દોડ્યા હતા, અને હવે રસીના સમાચારોના કારણે લોકો વેચવાલી કરી રહ્યા છે.
ઓગસ્ટમાં સોનું પહોંચ્યું હતું આગઝરતી સપાટીએ
ઓગસ્ટના પહેલા અઠવાડિયામાં સોનું તેની સૌથી ઉચ્ચ સ્તરે પહોંચ્યું હતું. 7 ઓગસ્ટે સોનાનો ભાવ 10 ગ્રામ દીઠ રૂ. 56,200 હતો. હવે સોમવારે દિલ્હી બુલિયન માર્કેટમાં સોનાની કિંમત 24 કેરેટ 51,000 અને 22 કેરેટ 46,350 રૂપિયા પ્રતિ 10 ગ્રામ છે. આ આધારે, સોનાના ભાવમાં અગાઉના ઉચ્ચ સ્તરેથી 10 ગ્રામ દીઠ 8,000 રૂપિયા સુધી ઘટાડો થયો છે.
અમેરિકા અને ચીનના સંબધો સુધરવાથી અને કોરોના મહામારીથી થયેલ આર્થિક નુકશાનથી અર્થતંત્રો ધીમે ધીમે બહાર આવી રહ્યા હોવાથી સોનાના ભાવમાં હજુ ઘટાડો થાય તેવી સંભાવના છે.