ભાવ / અમદાવાદમાં સોનાના ભાવમાં આટલા રૂપિયાનો કડાકો બોલી જતા ગ્રાહકો અને ઝવેરીઓ ખુશખુશાલ; જાણો નવો ભાવ

છેલ્લા બે દિવસમાં સોનાના ભાવ 10 ગ્રામ દીઠ 52,200 રૂપિયા રહ્યા છે જે શનિવારે 53,200 જેટલા રહ્યા હતા. ઝવેરીઓનું માનવું છે કે ભાવો ઘટવાથી ગ્રાહકો સોનુ ખરીદવા માટે આકર્ષાશે. 

જવેલર એસોસિએશન અમદાવાદના મતે શ્રાદ્ધનો સમય પૂરો થયા બાદ બજારમાં ફરી એક વખત હલચલ જોવા મળી રહી છે. લોકોએ સ્વીકાર્યું છે કે સોનું હવે કદાચ 50,000ની સપાટીથી ઓછું નહીં થાય અને તેથી તેઓ ધીમે ધીમે ખરીદી કરવા તરફ વળી રહ્યા છે. હજુ પણ લોકો સોનું ખરીદવા માટે એટલા તત્પર નથી પણ એવું માનવામાં આવે છે કે જો આ ભાવો સ્થિર રહ્યા તો સોનાની ખરીદી વધશે.

ખરીદી મુદ્દે ઈન્કવાયરીઓ વધી 

અમદાવાદના એક ઝવેરીના કહેવા પ્રમાણે લોકો સોનાના ભાવો તરફ નજર રાખી રહ્યા છે અને ખરીદી મુદ્દે ઈન્કવાયરી થોડા સમયથી વધી છે. તહેવારની ઋતુમાં વેચાણ વધવાની આશા છે કારણ કે ઘણા ફંક્શન્સ મે મહિનામાં યોજવા જઈ રહ્યા હતા તેમને પાછા ઠેલીને આ વર્ષના અંતમાં યોજવાનું પ્લાનિંગ કરવામાં આવ્યું છે. 

ઝવેરીઓના મતે હજુ પણ 70% ખરીદી જુના સોનાની એક્સચેન્જમાં થાય છે અને ફક્ત 30% ગ્રાહકો નવું સોનું લઇ રહ્યા છે.