બજાર / સોમવારે રૂપિયો ડાઉન થતા સોનાનાં ભાવમાં થયો વધારો, જાણો કેટલો

HDFC સિક્યોરિટીઝના વરિષ્ઠ વિશ્લેષક તપન પટેલે કહ્યું કે વૈશ્વિક બજારમાં સોનું મજબૂત થવું તેમજ ડોલરની સરખામણીએ રુપિયાના વિનિમય દરમાં તેજીથી ઘટાડાના કારણે દિલ્હીમાં 24 કેરેટ સોનાના ભાવમાં 118 રૂપિયાની તેજી જોવા મળી. 

સોમવારે માર્કેટના સમય દરમિયાન ડોલરની સરખામણીએ રૂપિયો અંદાજે 20 પૈસા કમજોર ચાલી રહ્યો હતો. તેમણે કહ્યું કે અમેરિકા અને ચીનના વેપાર સમજૂતિને લઇને અનિશ્ચિતતા અને સ્થાનિક શેર માર્કેટની સુસ્ત શરૂઆતના કારણે રૂપિયો દબાણમાં જોવા મળ્યો. ચાંદી પણ 293 રૂપિયા વધીને 45,263 રૂપિયા પ્રતિ કિલોગ્રામ પર બંધ જોવા મળી હતી. શુક્રવારના રોજ આ કિંમત 44,970 રૂપિયા પ્રતિ કિલોગ્રામ પર બંધ થઇ હતી. 

આંતરરાષ્ટ્રીય માર્કેટ પર નજર કરીએ તો અમેરિકા-ચીન વચ્ચે વેપાર સમજૂતિની આશા ઓછી હોવાના કારણે ગત સપ્તાહમાં સોનામાં ત્રણ ટકા જેટલો ઘટાડો જોવા મળ્યો. વૈશ્વિક માર્કેટમાં સોનું અને ચાંદીના ભાવ તેજી સાથે ક્રમશઃ 1,463 ડોલર પ્રતિ ઔંસ અને 16.85 ડોલર પ્રતિ ઔંસ પર હતો.