સોનાની ચમક દિવસેને દિવસે વધી રહી છે. બુધવારે દેશભરના વાયદા બજારમાં સોનાની કિંમત 48,980 રૂપિયા પ્રતિ 10 ગ્રામની કિંમતે વેચાણ થયું, જે એક નવો રેકોર્ડ છે. કોરોના સંકટ વચ્ચે સોનાની કિંમત નવો રેકોર્ડ બનાવી રહ્યું છે. જો આવી જ રીતે સોનાની કિંમતમાં ચમક જોવા મળશે તો જલ્દી જ ભાવ 50,000 રૂપિયાની પાર પહોંચી જશે.
જાણકારોના જણાવ્યાં મુજબ દુનિયાભરમાં કોરોના વાયરસના કારણે મોટાભાગના બજારમાં સુસ્તી જોવા મળી રહી છે. અમેરિકામાં કોરોના વાયરસ સંકટના કારણે ત્યાંનું શેરબજાર દબાણમાં છે, જેને લઇને લોકો સોનામાં વધારે ને વધારે રોકાણ કરવા દોડી રહ્યાં છે.
આંકડાના પુરાવા છેકે લોકો અત્યારે પણ આ ભાવમાં સોનામાં રોકાણ કરી રહ્યાં છે, એટલે આગળ પણ કીમતોમાં વધારો થવાની પુરી શક્યતા છે. કારણ કે સોનાએ અત્યાર સુધીમાં આશા કરતા વધારે રિટર્ન આપ્યું છે. છેલ્લા 5 વર્ષમાં સોનાનો ભાવ ડબલ (બે ગણો) થઇ ગયો છે. જ્યારે અંદાજે છેલ્લા દોઢ વર્ષમાં સોનાએ અંદાજે 50 ટકા રિટર્ન આપ્યું છે.
ઉલ્લેખનીય છે કે જુલાઇ-ઓગસ્ટ 2015માં સોનાનો ભાવ 25 હજાર રૂપિયાથી નીચે જતો રહ્યો હતો. જો તારીખની વાત કરીએ તો 6 ઓગસ્ટ 2015ના રોજ 10 ગ્રામનો ભાવ 24,980 રૂપિયા હતા. અહીંથી ઠીક 5 વર્ષ બાદ હવે સોનાનો ભાવ 50 રૂપિયા સુધી પહોંચી ગયો છે.
જો કે 2015માં સોનાની કિંમતમાં ભારે ઘટાડો જોવા મળ્યો. આ અગાઉ 2011માં સોનાનો ભાવ 31 હજાર રૂપિયા પ્રતિ 10 ગ્રામ હતો. સોનાની કિંમતોમાં 2019માં સૌથી ઝડપી તેજી જોવા મળી, જે હાલમાં પણ યથાવત્ છે.
જાન્યુઆરી-2019માં સોનાનો ભાવ અંદાજે 32 હજાર રૂપિયા પ્રતિ 10 ગ્રામ હતો, છેલ્લા દોઢ વર્ષમાં સોનાની કિંમતમાં અંદાજે 50 ટકા ઉછાળો જોવા મળ્યો છે. જ્યારે આ વર્ષે જાન્યુઆરીથી જૂન વચ્ચે સોનાનો ભાવ 25 ટકાથી વધારે વધ્યો છે.