પેરિસ / ઓલિમ્પિકમાં ભારતનું 'સુવર્ણ' સપનું રોળાયું, ભાલા ફેંકમાં નીરજને સિલ્વર, પાકિસ્તાનને ગોલ્ડ

ભારતની જેવલિન થ્રોમાં પણ ગોલ્ડ મેડલની આશા પર પાણી ફરી ગયું છે. નીરજ ચોપરાએ પેરિસ ઓલિમ્પિક્સમાં સિલ્વર મેડલથી સંતોષ માનવો પડ્યો હતો. ભારતના સ્ટાર જેવલિન થ્રોઅર નીરજ ચોપરાએ પેરિસ ઓલિમ્પિક્સમાં સિલ્વર મેડલ જીતી લીધો છે. ટોક્યો ઓલિમ્પિકમાં ગોલ્ડ જીતનાર સ્ટાર ભારતીય ભાલા ફેંકના ખેલાડી નીરજ ચોપરાએ પેરિસ ઓલિમ્પિક 2024માં પણ ઈતિહાસ રચ્યો છે. તેણે પેરિસમાં સિલ્વર જીતીને અદભૂત રેકોર્ડ પણ બનાવ્યો છે નીરજે 89.45 મીટરનો થ્રો કરીને સિલ્વર મેડલ જીત્યો છે. નીરજનો આ સિઝનનો આ સર્વશ્રેષ્ઠ થ્રો છે.

દરેક ઇવેન્ટમાં સારી શરૂઆત કરનાર નીરજને આ વખતે થોડો આંચકો લાગ્યો હતો. તેનો પહેલો જ થ્રો ફાઉલ થયો હતો.જોકે તેનો થ્રો 86 મીટરથી વધુ હતો, તે ધ્યાનમાં લેવામાં આવ્યો ન હતો. પાકિસ્તાનના અરશદ નદીમનો પહેલો થ્રો પણ ફાઉલ હતો પરંતુ પછીના થ્રોમાં અરશદે 92.97 મીટરના થ્રો સાથે ગોલ્ડ મેડલ મેળવ્યો હતો. આ સાથે તેણે નવો ઓલિમ્પિક રેકોર્ડ પણ બનાવ્યો હતો અને ગોલ્ડ પોતાના નામે કર્યો હતો. નીરજે પણ આગલા થ્રોમાં પુનરાગમન કર્યું અને 89.45 મીટર સાથે બીજું સ્થાન મેળવ્યું. નીરજના કૂલ 5 થ્રો ફાઉલ થયા હતા.

નીરજ ચોપરાએ ભારત માટે સિલ્વર મેડલ જીત્યો છે. વર્તમાન ઓલિમ્પિકમાં ભારતનો આ પાંચમો મેડલ હતો. આ પહેલા ભારતે ચાર મેડલ જીત્યા હતા. જેમાંથી ત્રણ બ્રોન્ઝ શૂટિંગમાં અને એક હોકીમાં આવ્યો હતો. મેન્સ જેવલિન થ્રોની ફાઇનલમાં નીરજે બીજા પ્રયાસમાં 89.45 મીટરનો થ્રો ફેંક્યો હતો. નીરજે સતત બીજી ઓલિમ્પિકમાં મેડલ જીત્યો છે. નીરજ ઓલિમ્પિકમાં વ્યક્તિગત ઈવેન્ટમાં ગોલ્ડ જીત્યા બાદ બીજો મેડલ જીતનાર પ્રથમ ભારતીય ખેલાડી બની ગયો છે.

અરશદ નદીમ ઓલિમ્પિકમાં વ્યક્તિગત ઈવેન્ટમાં ગોલ્ડ મેડલ જીતનાર પ્રથમ પાકિસ્તાની એથ્લેટ બન્યો. આ સાથે પાકિસ્તાને 32 વર્ષ બાદ ઓલિમ્પિક મેડલ જીતવામાં સફળતા મેળવી છે. આ પહેલા પાકિસ્તાને 1992 બાર્સેલોના ઓલિમ્પિકમાં મેન્સ હોકીમાં બ્રોન્ઝ મેડલ જીત્યો હતો. તે ઓલિમ્પિકમાં પાકિસ્તાન માટે વ્યક્તિગત મેડલ જીતનાર માત્ર ત્રીજો ખેલાડી બન્યો હતો.

બરાબર 3 વર્ષ પહેલા નીરજ ચોપરાએ ટોક્યો ઓલિમ્પિકમાં ભાલા ફેંકમાં ગોલ્ડ મેડલ જીતીને ઈતિહાસ રચ્યો હતો. ભારતના ઈતિહાસમાં એથ્લેટિક્સમાં આ પહેલો મેડલ હતો અને તે પણ સીધો ગોલ્ડ મેડલ. આ પછી નીરજે તેની રમતની દરેક સંભવિત વૈશ્વિક ટુર્નામેન્ટ જીતી, જેમાં વર્લ્ડ ચેમ્પિયનશિપ અને ડાયમંડ લીગ જેવા મહત્વના ટાઇટલનો સમાવેશ થાય છે.

ફાઇનલમાં તમામ 12 ખેલાડીઓનો શ્રેષ્ઠ થ્રો

1. અરશદ નદીમ (પાકિસ્તાન)- 92.97
2. નીરજ ચોપરા (ભારત) – 89.45 મીટર
3. એન્ડરસન પીટર્સ (ગ્રેનાડા) – 88.54 મીટર
4. જેકબ વાડલેચ (ચેક રિપબ્લિક) – 88.50 મીટર
5. જુલિયસ યેગો (કેન્યા) – 87.72 મીટર
6. જુલિયન વેબર (જર્મની) – 87.40 મીટર
7. કેશોર્ન વોલકોટ (ટ્રિનિદાદ અને ટોબેગો) – 86.16 મીટર
8. લસ્સી એટેલેટાલો (ફિનલેન્ડ) – 84.58 મીટર
9. ઓલિવર હેલેન્ડર (ફિનલેન્ડ) – 82.68 મીટર
10. ટોની કેરાનેન (ફિનલેન્ડ) – 80.92 મી
11. લુઇઝ મોરિસિયો દા સિલ્વા (બ્રાઝિલ) – 80.67 મીટર

12.એન્દ્રિયન માર્ડારે (મોલ્ડોવા)- 80.10 મી

વધુ વાંચો : નીરજ ચોપરાના ભાલાની કેટલી છે કિંમત? વજન, લંબાઈ સાથે ખાસિયતો જાણવા જેવી

શાનદાર પ્રદર્શન

નીરજ ચોપરાએ 6 ઓગસ્ટે યોજાયેલી ક્વોલિફિકેશનમાં માત્ર એક થ્રો સાથે ફાઇનલમાં પ્રવેશ કર્યો હતો. ભારતીય સ્ટારે જોરદાર પ્રદર્શન કર્યું અને પ્રથમ પ્રયાસમાં જ 89.34 મીટરનો થ્રો કર્યો અને ક્વોલિફાય કર્યું. આ નીરજના કારકિર્દીના સર્વશ્રેષ્ઠ 89.94 મીટરના થ્રો કરતા થોડો ઓછો હતો. ક્વોલિફિકેશન રાઉન્ડના બંને ગ્રુપમાં નીરજનો થ્રો સૌથી દૂર હતો અને તે નંબર-1 હતો.