આ સપ્તાહના ગ્રહયોગઃ તા.23-12-19 થી 28-12-19ના સપ્તાહના અગત્યના ગ્રહયોગો અને ખગોલિક સ્થિતિનો અભ્યાસ કરતાં સપ્તાહના અંતિમ દિવસે સૂર્ય અને ગુરુની યુતિ થાય છે. સપ્તાહના મધ્યમાં સૂર્ય અને હર્ષલના કેન્દ્રયોગ બને છે. આ સપ્તાહમાં મંગળ અને ગુરુ સ્વગૃહી છે. સપ્તાહની શરૂઆતમાં બુધ પૂર્વાસ્ત થાય છે.
અગત્યના ગ્રહયોગો અને ખગોલિક સ્થિતિ
સોના-ચાંદીના ભાવમાં થઇ શકે ઘટાડો
આ સપ્તાહમાં ધન રાશિમાં સૂર્યગ્રહણ થાય છે, જે ભારતમાં દેખાવાનું છે અને ધન રાશિમાં શનિ, ગુરુ, બુધ પણ સાથે ભ્રમણ કરે છે. આ ગ્રહયોગો આ સપ્તાહમાં બજારની કેવી ચાલ બતાવશે તે આપણે જોઇએ.
શેરબજારઃ
મિત્રો, ઉપરોક્ત ગ્રહયોગોનો અભ્યાસ કરતાં શેરબજારમાં આ સપ્તાહની શરૂઆત નરમ બજાર ખૂલીને થઇ શકે છે પણ સપ્તાહની શરૂઆતના દિવસથી બજારમાં વેચાણ કરતાં જવું. બજારમાં દરેક ભાવે વેચાણ કરી શકાય તેવી રીતે વેપાર ગોઠવવો. સપ્તાહના મધ્યના દિવસો સુધી બજારમાં મંદીનો વેપાર ગોઠવી શકાય. આ દિવસોમાં કોઇ દિવસે સાંકડી વધઘટ આવી શકે છે અથવા બેતરફી બજાર જોવા મળી શકે છે.
સપ્તાહના અંતિમ દિવસોમાં નફો બુક કરતાં જવો હિતાવહ છે. આ દિવસોમાં બજારમાં નફારૂપી લેવાલી નીકળતાં ભાવ મજબૂતી બતાવી શકે છે. આ સપ્તાહના અંતિમ દિવસોમાં પણ બજારમાં તેજીનો ઉછાળો આવી શકે છે પણ લાંબા સમય માટેનો તેજીનો વેપાર કરવો હિતાવહ નથી. એકંદરે આ સપ્તાહમાં શરૂઆતના દિવસોમાં અને મધ્યના દિવસોમાં નરમાઇ જોવા મળે અને અંતિમ દિવસમાં સામાન્ય મજબૂતી જોવા મળી શકે છે.
સોના-ચાંદીઃ
સોના-ચાંદી હાજર અને વાયદામાં સપ્તાહની શરૂઆત નરમાઇ અને સારી વેચવાલીથી થઇ શકે છે અને શરૂઆતના દિવસોમાં બંને કીમતી ધાતુમાં મોટી વધઘટ જોવા મળે. સોના-ચાંદી વાયદા અને હાજરમાં આ સપ્તાહના શરૂઆતના દિવસથી જ બજારમાં દરેક ભાવે વેચાણ કરતાં જવું. દરેક શરૂઆતના દિવસોથી જ નરમ ધ્યાન રાખીને વેપાર કરવો. સપ્તાહના શરૂઆતના દિવસોમાં અને મધ્યના દિવસોમાં ચાંદીમાં મોટી અને ઝડપી વેચવાલી આવી શકે છે. સપ્તાહના મધ્યના દિવસો સુધી વેચીને વેપાર કરવો લાભદાયી થઇ શકે છે.
ક્રૂડ ઓઇલઃ
મિત્રો ક્રૂડ ઓઇલમાં આ સપ્તાહની શરૂઆત સાંકડી વધઘટથી થઇ શકે છે. સપ્તાહના શરૂઆતના દિવસથી સ્ટોક કરી તેજીનો વેપાર ગોઠવવાથી લાભ મેળવી શકો છો. આ સપ્તાહના શરૂઆતના દિવસોમાં દરેક ભાવે સ્ટોક કરી તેજીનો વેપાર ગોઠવતાં જવો. આ સપ્તાહના મધ્ય સુધીના દિવસો સુધી સ્ટોક દરેક ભાવે કરી શકાય તેવી રીતે વેપાર કરવો. આ દિવસમાં બજાર બેતરફી ચાલ પણ બતાવી શકે છે અથવા કોઇ દિવસ સાંકડી વધઘટ બતાવી શકે છે. આ સપ્તાહમાં શરૂઆતના દિવસોથી મજબૂતી ધ્યાન રાખી વેપાર કરવો. સપ્તાહના અંતિમ દિવસો સુધી તેજીનો વેપાર રાખી શકાય. સપ્તાહના અંતિમ દિવસો ફોરેન માર્કેટમાં નવી લેવાલી આવતાં અહીંના બજારમાં પણ મજબૂત ભાવ રહી શકે છે.
એરંડા-દિવેલઃ
આ સપ્તાહમાં તેલ, એરંડા અને દિવેલ વાયદા અને હાજરમાં સપ્તાહની શરૂઆત મજબૂત બજારથી થાય. તેલમાં સારી તેજી આ સપ્તાહમાં જોવા મળે. સપ્તાહની શરૂઆતના દિવસ જોવા. આ સપ્તાહમાં તેલ-તેલીબિયાં, કપાસિયા, એરંડા, દિવેલ, તેલમાં મજબૂત ધ્યાન રાખીને વેપાર દરેક ભાવે કરવો. આ સપ્તાહમાં તેલ, એરંડામાં તેજીનો વેપાર કરવો. આ દિવસોમાં એકાદ સારો તેજીનો ઉછાળો આવી શકે છે. કપાસિયા, એરંડા અને દિવેલ, તેલમાં આ સપ્તાહમાં ફોરેન માર્કેટમાં નવી લેવાલી આવતાં અહીંના બજારમાં અને માર્કેટયાર્ડમાં પણ ભાવમાં મજબૂતી જોવા મળે.
કપાસ-રૂઃ
આ સપ્તાહમાં કપાસ અને રૂ હાજર અને વાયદામાં આ સપ્તાહની શરૂઆત મજબૂત ભાવથી થાય અને શરૂઆતના દિવસોથી નવી માગ નીકળતાં બજારમાં મજબૂતી જોવા મળે પણ સપ્તાહની શરૂઆતથી દરેક ભાવે સ્ટોક કરીને વેપાર ગોઠવવો. કોઇ દિવસ બજારમાં સાંકડી વધઘટ બતાવે તો પણ મંદીનો વેપાર કરવો નહીં. તેજીનો વેપાર દરેક ભાવે ગોઠવવો. સપ્તાહના મધ્યના દિવસો સુધી સ્ટોક કરી શકાય તેવી રીતે વેપાર કરતાં જવો. સપ્તાહના અંતિમ દિવસોમાં ફોરેન બજારમાં કપાસ અને રૂમાં નવી લેવાલી આવતાં અહીંના સ્થાનિક બજારમાં પણ મજબૂત ભાવ જોવા મળે.