લગ્નસરાની સિઝનમાં ભારે માંગ હોવા છતાં વૈશ્વિક બજારમાં જોવા મળેલા ઘટાડાની અસર સોનાના ભાવ પર જોવા મળી રહી છે.
લગ્નની સિઝન વચ્ચે સોનાની ભારે માંગ
સોનાના ભાવમાં આજે નોંધાયો ઘટાડો
ચાંદીના પણ ઘટ્યા ભાવ
લગ્નની સિઝન ચાલી રહી છે. બજારોમાં ખરીદી જામી છે. તેમાં પણ લગ્નનમાં સૌથી કિંમતી એવા સોનાની ખરીદી પણ ગ્રાહકો કરી રહ્યા છે. ત્યારે જો તમે પણ સોનાની ખરીદી કરવાનું વિચારો છો તો આજેજ માર્કેટમાં પહોંચી જાઓ. કારણ કે લગ્નસરાની સિઝનમાં ભારે માંગ હોવા છતાં બુધવારે સોના-ચાંદીના ભાવમાં ઘટાડો નોંધાયો હતો.મલ્ટી કોમોડિટી એક્સચેન્જ (MCX) સોનું હાલમાં રૂ.51 હજારની આસપાસ વેચાઈ રહ્યું છે, જ્યારે ચાંદીનો ભાવ રૂ.65 હજારથી નીચે આવી ગયો છે.
સોનાની કિંમતમાં થયો ઘટાડો
MCX પર, 24 કેરેટ શુદ્ધતા સોનાની વાયદાની કિંમત સવારે રૂ. 116 ઘટીને રૂ. 51,468 પ્રતિ 10 ગ્રામ થઈ હતી. આ જૂનના વાયદાનો ભાવ છે. ત્યારે જો મંગળવારની ટ્રેડિંગ છોડી દેવામાં આવે તો સોનાના ભાવમાં સતત છ કારોબારી સત્રમાં ઘટાડો જોવા મળી રહ્યો છે. આ દરમિયાન સોનું 1800 રૂપિયા પ્રતિ 10 ગ્રામ સસ્તું થયું છે. આ મહિનાની શરૂઆતમાં સોનાની કિંમત 54 હજાર રૂપિયાની આસપાસ પહોંચી ગઈ હતી.
ચાંદીની ચમક ઘટી
MCX પર આજના કારોબારમાં ચાંદીના વાયદામાં પણ ઘટાડો જોવા મળ્યો હતો.સવારે ચાંદીનો વાયદો ભાવ 100 રુપિયા ઘટીને રૂ.64,868 પ્રતિ કિલોગ્રામ પર આવી ગયો હતો. ગઈકાલના કારોબારમાં ચાંદી 65 હજારની ઉપર વેચાઈ રહી હતી. સોનાની જેમ ચાંદીની કિંમત પણ છેલ્લા કેટલાક સત્રોથી સતત ઘટી રહી છે અને આ મહિનાની શરૂઆતમાં 70 હજાર રૂપિયાથી ઉપર વેચાતી ચાંદીની કિંમત હવે ઘટીને 65 હજારની નીચે આવી ગઈ છે.
વૈશ્વિક બજારમાં પણ ઘટાડો
વૈશ્વિક બજારમાં પણ સોનાના ભાવમાં ઘટાડો થયો છે, પરંતુ ચાંદીના ભાવમાં થોડો ઉછાળો જોવા મળ્યો છે. વૈશ્વિક બજારમાં સોનાનો હાજર ભાવ 0.37 ટકા ઘટીને 1,898.60 ડોલર પ્રતિ ઔંસ થયો હતો. તે જ સમયે, ચાંદીનો હાજર ભાવ 0.13 ટકા વધીને $23.50 પ્રતિ ઔંસ થયો હતો. થોડા દિવસો પહેલા સુધી સોનાની કિંમત પણ 2,000 ડોલર પ્રતિ ઔંસને પાર કરતી જોવા મળી હતી.
આ વર્ષે ભાવ 60 હજાર સુધી જશે
નિષ્ણાતોનું કહેવું છે કે વર્ષ 2022માં સોનાની કિંમત 58 થી 60 હજાર રૂપિયા પ્રતિ 10 ગ્રામ સુધી જઈ શકે છે. આના ઘણા કારણો છે. તેનું સૌથી મોટું કારણ સમગ્ર વિશ્વમાં મોંઘવારી વધી રહી છે. ભારત હોય કે અમેરિકા, તમામ દેશો છૂટક મોંઘવારીથી પરેશાન છે. રિઝર્વ બેંકે પણ આખા વર્ષ માટે છૂટક ફુગાવાના અંદાજમાં લગભગ 1 ટકાનો વધારો કર્યો છે. મોંઘવારી વધવાની સાથે સોનાની કિંમત પણ ચોક્કસપણે વધે છે. જો રશિયા અને યુક્રેન વચ્ચે ચાલી રહેલું યુદ્ધ સમાપ્ત થાય તો પણ સોનાની કિંમત 50 હજાર રૂપિયાથી નીચે નહીં જાય.