ભગવો લહેરાયો / ગાંધીનગરમાં પાટીલ-પટેલનો પાવર ચાલ્યો, આપના કારણે કોંગ્રેસને થયું આ મોટું નુકસાન

• ગાંધીનગર મનપામાં ભાજપની સત્તા 
• વિજયની ઉજવણી શરૂ થઈ 
• આમ આદમી પાર્ટી અને કોંગ્રેસનો સૂપડા સાફ 
• સી આર પાટિલ અને ભૂપેન્દ્ર પટેલની હાજરીમાં થશે ઉજવણી 

ભારતીય જનતા પાર્ટીનું શાનદાર પ્રદર્શન, વિજયોત્સવ શરૂ 
ભારતીય જનતા પાર્ટીએ વધુ એક મણપમાં જોરદાર પ્રદર્શન કરી બતાવ્યું છે, ગાંધીનગર મનપા ચૂંટણીનાં પરિણામોમાં ભારતીય જનતા પાર્ટીને સ્પષ્ટ બહુમતી મળી ગઈ છે. ગાંધીનગરની મનપામાં પહેલીવાર ભાજપને આટલી મોટી બહુમતી મળી છે ત્યારે આ જીતનો શ્રેય ભાજપના પ્રદેશ અધ્યક્ષ પાટીલ અને સીએમ પટેલને ફાળે જઈ રહ્યો છે. મનપામા જ્યાં હવે ભગવાની સત્તા રહેશે ત્યારે કમલમ ખાતે મોટા પાયે જશ્નનું આયોજન પણ કરવામાં આવ્યું છે. 

ગાંધીનગર મનપા ચૂંટણીનું પરિણામ:

સત્તાધીશો બદલ્યા બાદ પહેલી પરીક્ષામાં ભાજપ પાસ, ફૂલ માર્કસ સાથે 
ગુજરાતમાં થોડા દિવસ પહેલા જ સત્તા બદલવામાં આવી છે. રૂપાણી સહિત આખી કેબિનેટનું રાજીનામું લઈ લેવામાં આવ્યું અને આખી નવી સરકાર તથા નવા મંત્રીઓ નવા મુખ્યમંત્રી સાથે આવ્યા. નવા મુખ્યમંત્રી બનાવ્યા બાદ ગાંધીનગરની ચૂંટણી ભારતીય જનતા પાર્ટી માટે પહેલી પરીક્ષા હતી અને આ પરીક્ષામાં ભારતીય જનતા પાર્ટી ફૂલ માર્કસ સાથે પાસ થઈ ગઈ હોય તેવા પરિણામો સામે આવી રહ્યા છે.

પાટીલની રણનીતિ કામે લાગી, આપ અને કોંગ્રેસનાં સૂપડા સાફ 
ગાંધીનગરમાં ફરીવાર સી આર પાટીલની રણનીતિ કામે લાગી હોય તેવું સ્પષ્ટપણે દેખાઈ રહ્યું છે. આ વખતે આમ આદમી પાર્ટીએ પણ ખૂબ જોર લગાવ્યું હતું. આમ આદમી પાર્ટી દ્વારા જીતના ખૂબ મોટા મોટા દાવાઓ કરવામાં આવી રહ્યા હતા ત્યારે કોંગ્રેસનાં પણ સૂપડા સાફ થઈ ગયા છે. જે મનપામાં 2011માં કોંગ્રેસ જીતી અને 2016માં પણ સારી બેઠકો મેળવી તે જ મનપામાં કોંગ્રેસ પાર્ટી હવે માત્ર એક જ બેઠક જીતી શકી છે. 

ગાંધીનગરમાં પહેલીવાર ભારતીય જનતા પાર્ટીને સ્પષ્ટ બહુમતી 
ગાંધીનગર કોર્પોરેશનની ચૂંટણીમાં મનપામાં પહેલીવાર ભારતીય જનતા પાર્ટીને સ્પષ્ટ બહુમતી મળી ગઈ છે. વર્ષ 2011માં થયેલ ચૂંટણીમાં કોંગ્રેસ પાર્ટીનો વિજય થયો હતો જ્યારએ 2016માં ટાઈ થઈ હતી અને ભાજપ અને કોંગ્રેસ બંનેને સમાન બેઠકો મળી ગઈ હતી. જોકે આ વખતે ભારતીય જનતા પાર્ટીને સ્પષ્ટ બહુમતી મળી ગઈ છે. 2011માં કોંગ્રેસને 18 જ્યારે ભાજપને 15 બેઠકો મળી હતી. જ્યારે 2016માં ભાજપ અને કોંગ્રેસ બંને પાર્ટીઓને 16 16 બેઠકો મળી ગઈ હતી.