જનાદેશ / સૌરાષ્ટ્રમાં મોટો ફટકો: રૂપાણીના ગઢમાં જ કોંગ્રેસે આ 2 બેઠક પર ખેરવ્યા ભાજપના કાંગરા

• પૂર્વ CM વિજય રૂપાણીના ગઢમાં ગાબડું
• ફરી એકવાર કોંગ્રેસે 2 બેઠક ભાજપ પાસેથી આંચકી
• ગાંધીનગરમાં ભાજપને મળી ભવ્ય જીત

રાજકોટ જિલ્લા પંચાયતની સાણથલી અને શિવરાજપુર બેઠક પર કોંગ્રેસના બંને ઉમેદવારની જીત થઇ છે અને ભાજપનો કારમો પરાજય થયો છે. આ બંન્ને બેઠકો જસદણ તાલુકામાં આવતી હોવાથી ભાજપે પૂર્વ કેબિનેટ મંત્રી અને જસદણના ધારાસભ્ય કુંવરજી બાવળિયાને સોંપી હતી. જો કે, બંન્ને બેઠક પર કોંગ્રેસે જીત હાંસલ કરતા પૂર્વ મુખ્યમંત્રી વિજય રૂપાણી અને પૂર્વ કેબિનેટ મંત્રી કુંવરજી બાવળિયાના ગઢમાં ગાબડું પડ્યું છે.

ફરી એકવખત ભાજપની હાર

જસદણની બે બેઠક સાણથલી અને શિવરાજપૂર બેઠક કોંગ્રેસ પાસેથી ફરી એકવખત ભાજપ આંચકી શક્યુ નહીં, જસદણ અને રાજકોટમાં પરાજયને લઈ ગણગણાટ શરૂ થયો છે. પ્રદેશ પ્રમુખ સી.આર.પાટીલને રજૂઆત કરી સંગઠનના આ અગ્રણીઓ સામે પગલા લેવાની એક જૂથ માંગ કરશે તેવી ચર્ચાઓ શરૂ થઈ છે. 

પીએમ મોદી અને નીતિન પટેલનાં ગઢ મહેસાણામાં ભાજપની જીત 

ગુજરાતમાં આજે ગાંધીનગર મહાનગરપાલિકા સહિત અન્ય મહાનગરપાલિકાની પેટાચૂંટણીનાં પરિણામો સામે આવી રહ્યા છે. એવામાં મહેસાણામાં થયેલ પેટાચૂંટણીમાં ભારતીય જનતા પાર્ટીનો વિજય થયો છે. મહેસાણા પાલિકાની બેઠક પર પેટાચૂંટણી કરવામાં આવી હતી જેમા  વોર્ડ-11માં ફાલ્ગુની બેન 1900 મતથી જ્યારે વડનગર પાલિકા વોર્ડ -7માં દર્શનાબેન સોની 517 મતથી જીત્યા છે. 

તાલુકા પંચાયતની પેટાચૂંટણીમાં કોંગ્રેસ જીતી 

જોકે મહત્વનું છે કે તાલુકા પંચાયતની પેટા ચૂંટણીમાં કોંગ્રેસ પાર્ટીએ જીત મેળવી છે. મહેસાણા તાલુકા પંચાયતની વડસ્મા બેઠક પર કોંગ્રેસના નટવરજી મકવાણા 215 મતથી વિજેતા થયા છે જ્યારે સતલાસણા તાલુકા પંચાયતની રાણપુર બેઠક પર કોંગ્રેસના ઉમેદવાર કનુભાઈ બારોટ 175 મતથી વિજયી બન્યા છે. 

દ્વારકામાં ઓખા નપામાં ભાજપનો કબ્જો

દ્વારકાની ઓખા નગરપાલિકામાંમાં ભાજપનો ભગવો લહેરાયો છે. 9 વોર્ડની 36 બેઠકોમાંથી 34 બેઠકો ભાજપે જીતી છે જ્યારે 2 બેઠકો પર કોંગ્રસનો વિજય થયો છે. 

ભારતીય જનતા પાર્ટીનું શાનદાર પ્રદર્શન, વિજયોત્સવ શરૂ 

ભારતીય જનતા પાર્ટીએ વધુ એક મનપામાં જોરદાર પ્રદર્શન કરી બતાવ્યું છે, ગાંધીનગર મનપા ચૂંટણીનાં પરિણામોમાં ભારતીય જનતા પાર્ટીને સ્પષ્ટ બહુમતી મળી ગઈ છે. ગાંધીનગરની મનપામાં પહેલીવાર ભાજપને આટલી મોટી બહુમતી મળી છે ત્યારે આ જીતનો શ્રેય ભાજપના પ્રદેશ અધ્યક્ષ પાટીલ અને સીએમ પટેલને ફાળે જઈ રહ્યો છે. મનપામા જ્યાં હવે ભગવાની સત્તા રહેશે ત્યારે કમલમ ખાતે મોટા પાયે જશ્નનું આયોજન પણ કરવામાં આવ્યું છે. 

સત્તાધીશો બદલ્યા બાદ પહેલી પરીક્ષામાં ભાજપ પાસ, ફૂલ માર્કસ સાથે 

ગુજરાતમાં થોડા દિવસ પહેલા જ સત્તા બદલવામાં આવી છે. રૂપાણી સહિત આખી કેબિનેટનું રાજીનામું લઈ લેવામાં આવ્યું અને આખી નવી સરકાર તથા નવા મંત્રીઓ નવા મુખ્યમંત્રી સાથે આવ્યા. નવા મુખ્યમંત્રી બનાવ્યા બાદ ગાંધીનગરની ચૂંટણી ભારતીય જનતા પાર્ટી માટે પહેલી પરીક્ષા હતી અને આ પરીક્ષામાં ભારતીય જનતા પાર્ટી ફૂલ માર્કસ સાથે પાસ થઈ ગઈ હોય તેવા પરિણામો સામે આવી રહ્યા છે.

પાટીલની રણનીતિ કામે લાગી, આપ અને કોંગ્રેસનાં સૂપડા સાફ 

ગાંધીનગરમાં ફરીવાર સી આર પાટીલની રણનીતિ કામે લાગી હોય તેવું સ્પષ્ટપણે દેખાઈ રહ્યું છે. આ વખતે આમ આદમી પાર્ટીએ પણ ખૂબ જોર લગાવ્યું હતું. આમ આદમી પાર્ટી દ્વારા જીતના ખૂબ મોટા મોટા દાવાઓ કરવામાં આવી રહ્યા હતા ત્યારે કોંગ્રેસનાં પણ સૂપડા સાફ થઈ ગયા છે. જે મનપામાં 2011માં કોંગ્રેસ જીતી અને 2016માં પણ સારી બેઠકો મેળવી તે જ મનપામાં કોંગ્રેસ પાર્ટી હવે માત્ર એક જ બેઠક જીતી શકી છે. 

ગાંધીનગરમાં પહેલીવાર ભારતીય જનતા પાર્ટીને સ્પષ્ટ બહુમતી 

ગાંધીનગર કોર્પોરેશનની ચૂંટણીમાં મનપામાં પહેલીવાર ભારતીય જનતા પાર્ટીને સ્પષ્ટ બહુમતી મળી ગઈ છે. વર્ષ 2011માં થયેલ ચૂંટણીમાં કોંગ્રેસ પાર્ટીનો વિજય થયો હતો જ્યારએ 2016માં ટાઈ થઈ હતી અને ભાજપ અને કોંગ્રેસ બંનેને સમાન બેઠકો મળી ગઈ હતી. જોકે આ વખતે ભારતીય જનતા પાર્ટીને સ્પષ્ટ બહુમતી મળી ગઈ છે. 2011માં કોંગ્રેસને 18 જ્યારે ભાજપને 15 બેઠકો મળી હતી. જ્યારે 2016માં ભાજપ અને કોંગ્રેસ બંને પાર્ટીઓને 16 16 બેઠકો મળી ગઈ હતી.