ચેતવણી! / આર્કટિકમાં ભારે ઝડપથી વધી રહી છે ભયંકર ગરમી : 0.75 ડિગ્રી સેલ્સિયસ વધ્યું તાપમાન

• છેલ્લા એક દાયકામાં આર્કટિકનું તાપમાન 0.75 ડિગ્રી સેલ્સિયસ વધ્યું 
• ગ્લોબલ વોર્મિંગને કારણે ઈકોસિસ્ટમ પણ ઘણી બદલાઈ છે
• જો આ ગતિ પર કાબૂ નહીં મેળવવામાં આવે તો આગામી કેટલાક વર્ષોમાં અહીંનું તાપમાન બે ડિગ્રી સેલ્સિયસથી ઉપર પહોંચી શકે

જર્નલ સાયન્સ એડવાન્સમાં પ્રકાશિત થયેલા આ અભ્યાસમાં તાપમાનમાં વૃદ્ધિનો આર્કટિક અને એન્ટાર્કટિકાના વન્યજીવન, ટુંડ્રા વનસ્પતિ, મિથેન લીક અને બરફની ચાદરો પર પડેલા પ્રભાવો અંગે વિસ્તૃત વિગતો આપવામાં આવી છે. અમેરિકાની યુનિવર્સિટી ઑફ કેલિફોર્નિયા (યુસી) ડેવિસના સંશોધકોએ અભ્યાસ દરમિયાન એ તપાસ પણ કરી હતી કે, જો ગ્લોબલ વોર્મિંગના કારણે  પૃથ્વીનું તાપમાન બે ડિગ્રી વધે છે તો તેનો ધ્રુવીય પ્રદેશો પર શું પ્રભાવ પડી શકે છે.
 
છેલ્લા એક દાયકામાં થયેલા ઘણા ફેરફારો એટલા નાટકીય છે કે તેઓ તમને આશ્ચર્યચકિત કરે છે

યુસી ડેવિસ ખાતે 'ક્લાઇમેટ ચેન્જ ઈકોલૉજી' શીખવતા અને અભ્યાસના મુખ્ય લેખક એરિક પોસ્ટે કહ્યું કે, છેલ્લા એક દાયકામાં થયેલા ઘણા ફેરફારો એટલા નાટકીય છે કે તેઓ તમને આશ્ચર્યચકિત કરે છે. આ સાથે જ એ વિચારવા પણ મજબૂર કરે છે કે, ગરમીના કારણે આગામી દાયકામાં પૃથ્વીનું સ્વરૂપ કેવું થઈ શકે છે. તેમણે વધુમાં કહ્યું કે, જો આપણે જૂના ચિત્રો જોઈને એ કલ્પના કરીએ છીએ કે આજે પણ આર્કટિકનું સ્વરૂપ એવું જ છે તો એ ફક્ત ખુદને સમજાવવાની વાત છે. તેનું સ્વરૂપ સતત બદલી રહ્યું છે. ગ્લોબલ વોર્મિંગને કારણે તેની ઈકોસિસ્ટમ પણ ઘણી બદલાઈ છે. જો આપણે સમયસર તેનાથી બચવા માટે અસરકારક પગલાં નહીં ભરીએ તો એ નિશ્ચિત છે કે આજથી થોડા દાયકાઓ બાદ તમે તમારા બાળકોને કહેશો કે, આર્કટિકનો આ ભાગ ક્યારેક બરફથી ઢંકાયેલો રહેતો હતો.

આર્કટિકના તાપમાનમાં સાત ડિગ્રી સેલ્સિયસ સુધીનો વધારો થઈ શકે

સંશોધકોએ કહ્યું કે, જો આપણે 40 વર્ષ બાદ પણ તાપમાનના વધારાને બે ડિગ્રી સેલ્સિયસથી નીચે રાખવા ઈચ્છીએ તો આપણા નીતિઓએ દરેક ક્ષેત્રમાં સામાન્ય દ્રષ્ટિકોણ અપનાવવો પડશે અને ઉત્સર્જન ઘટાડવાનો પણ પ્રયાસ કરવો પડશે. પોસ્ટે કહ્યું કે, જે ઝડપથી આર્કટિકનું તાપમાન વધી રહ્યું છે એ ખુબ જ ચિંતાજનક છે. જો આ ગતિ પર કાબૂ નહીં મેળવવામાં આવે તો આગામી કેટલાક વર્ષોમાં અહીંનું તાપમાન બે ડિગ્રી સેલ્સિયસથી ઉપર પહોંચી શકે છે. અભ્યાસ અનુસાર, જો વૈશ્વિક તાપમાનમાં બે ડિગ્રી સેલ્સિયસનો વધારો થાય છે તો તેનાથી આર્કટિકના તાપમાનમાં સાત ડિગ્રી સેલ્સિયસ સુધીનો વધારો થઈ શકે છે, જ્યારે એન્ટાર્કટિકાના તાપમાનમાં ત્રણ ડિગ્રીનો વધારો થઈ શકે છે. જો આવું થાય તો તેના વિનાશક પરિણામો જોવા મળશે, આથી સમયસર કાર્બન ઉત્સર્જનને ઘટાડવા માટે અસરકારક પગલાં ભરવાની જરૂર છે.