કોરોના વાયરસ / રશિયાની રસી પર વિશ્વને આશંકા કેમ ? દેખાઈ રહી છે આ પાંચ ગડબડ !

• રશિયાના રાષ્ટ્રપતિએ રસીની કરી જાહેરાત 
• પુટીનની દીકરીને આપવામાં આવી સૌથી પહેલો ડોઝ 
• રસી પર વિશ્વના નિષ્ણાતોએ વ્યક્ત કરી આશંકા 

રશિયામાં વર્તમાનમાં આઠ લાખ કોરોના વાયરસના કેસ થયા છે અને આમ વિશ્વમાં અમેરિકા, બ્રાઝિલ અને ભારત બાદ તે ચોથો સૌથી વધુ પ્રભાવિત દેશ છે. ગમાલ્યા ઇન્સ્ટીટયુટ દ્વારા આ રસી બની છે અને રજીસ્ટ્રેશનના ત્રણ સાત દિવસમાં સામાન્ય નાગરિકને આ રસી ઉપલબ્ધ થઇ જશે. જોકે રશિયાની આ રસીમાં જાણકારોને પાંચ ગડબડ દેખાઈ રહી છે. 

ઓગસ્ટ મહિનાની શરૂઆતમાં રશિયાના સ્વાસ્થ્ય મંત્રીએ કહ્યું હતું કે રસીનું ટ્રાયલ પૂરૂ થઇ ગયું છે અને સપ્ટેમબર મહિનામાં તેનું પ્રોડક્શન શરુ થઇ જશે. પરંતુ હવે અચાનક જ રસી લોન્ચ કરી દેતા શંકા થઇ રહી છે. કારણ કે કોઈ પણ રસી તૈયાર કરવામાં વર્ષો લાગી જાય છે. એવામાં રશિયાએ આટલા ઓછા સમયમાં રસી લોન્ચ કરી દેતા એક્સપર્ટસને આ વાત પેટમાં પચી નથી રહી. 

નોંધનીય છે કે કોરોના વાયરસની રસી માટે કરવામાં આવેલ ટ્રાયલમાં ઇન્સ્ટીટયુટ દ્વારા અત્યાર સુધી બીજા અને ત્રીજા ટ્રાયલના આંકડા સાર્વજનિક કરવામાં આવ્યા નથી. કોઈ પણ રસી તૈયાર કરવામાં બીજું અને ત્રીજું ટ્રાયલ ખૂબ અગત્યનું હોય છે. WHOએ પણ કહ્યું છે કે તેમની પાસે માત્ર ફેઝ વનના જ આંકડાઓ છે. 

ટ્રાયલસાઈટ નામની એક વેબસાઈટના અહેવાલ અનુસાર આ રસીમાં ફેઝ વન પૂર્ણ થયાને એક મહિનો પણ નથી થયો. આ હિસાબથી રસી બીજા ફેઝમાં જ છે. એવામાં શક્યતા છે કે રશિયાએ ત્રીજા ફેઝ વગર જ રસી ઉતારી દીધી. બીજી તરફ અન્ય કંપનીઓ દ્વારા ત્રીજા ફેઝમાં ઓછામાં ઓછા 30 હજાર લોકો પર ટ્રાયલ કરી રહી છે. આ ટ્રાયલ પૂરો થવામાં અમુક મહિનાનો સમય તો લાગી જ શકે છે.

વિશ્વના નિષ્ણાતો માની રહ્યા છે કે રશિયાએ આ રસી ઉતાવળમાં લોન્ચ કરી દીધી છે. અમેરિકાના ડૉ.ફોસીએ તો ત્યાં સુધી કહી દીધું કે હું આશા રાખું છું કે રશિયા અને ચીનના વૈજ્ઞાનિકો રસી લોકોને આપતા પહેલા ખરેખર તેની ટેસ્ટિંગ કરશે. 

નોંધનીય છે કે રશિયા અને અમેરિકા ઘણીવાર એકબીજાની હરીફાઈમાં ઉતરતા હોય છે. અંતરીક્ષમાં માનવ મોકલવા અને ચંદ્ર પર પગ મૂકવા માટે પણ રશિયા અને અમેરિકા વચ્ચે જે રેસ લાગી હતી, એવી જ સ્થિતિ હાલ રસી માટે દેખાઈ રહી છે. આ બે દેશ સિવાયની પણ વિશ્વ શક્તિઓ આ રેસમાં કૂદી પડી છે. 

નોંધનીય છે કે આ બધા સવાલોના જવાબમાં રશિયાના સ્વાસ્થ્ય મંત્રાલયના મહામારીના વિશેષજ્ઞ નિકોલઈ બિક્રોએ કહ્યું કે રશિયાએ રસી બનાવવાની શરૂઆત એકદમ જીરોથી નથી કરી એટલે અમે આટલા ઓછા સમયમાં કોરોનાની રસી લોન્ચ કરી દેવામાં સક્ષમ છે. ગમાલ્યા રિસર્ચ સેન્ટર આ પ્રકારની રસી બનાવવામાં પ્રખ્યાત છે.