રિસર્ચ / પરમાણુ યુદ્ધનો ખતરો વધ્યોઃ ચીન અને પાકિસ્તાને પણ હથિયાર વધાર્યાં

થિંક ટેન્ક સ્ટોકહોમ ઇન્ટરનેશનલ પીસ રિસર્ચ ઇન્સ્ટિટયૂટે પોતાના રિસર્ચમાં જાણ્યું કે દુનિયાના નવ પરમાણુ સંપન્ન દેશો પાસે ર૦૧૮માં ૧૩,૮૬પ હથિયાર હતા. જ્યારે એક વર્ષ પહેલાં તેની સંખ્યા ૧૪,૪૬પ હતી. રિસર્ચરોનું કહેવું છે કે અમેરિકા અને ઇરાનની વચ્ચે જે રીતે તણાવ વધ્યો છે તેનાથી દુનિયામાં પરમાણુ યુદ્ધનો ખતરો ઊભો થયો છે. 

એક વિજ્ઞાનીએ જણાવ્યું કે કેવી રીતે પરમાણુ સંપન્ન દેશ સંખ્યા વધારવાના બદલે પોતાના હથિયારોની ક્ષમતાને લઇને વધુ ચિંતામાં છે. રિસર્ચના એસોસીએટ સિનિયર ફેલોએ જણાવ્યું કે આ નવા પ્રકારની ‌આર્મ્સ રેસ છે. તેમાં હથિયારોની સંખ્યા નથી, પરંતુ ટેકનોલોજી પર વધુ ફોકસ છે. રિપોર્ટ મુજબ ર૦૧૮માં રશિયા, અમેરિકા અને યુકેએ પોતાના હથિયારોની સંખ્યા ઘટાડી છે. જ્યારે ચીન, પાકિસ્તાન, ઇઝરાયેલ અને નોર્થ કોરિયાએ પોતાના હથિયારોમાં ૧૦થી ર૦ ટકાનો વધારો કર્યો છે. 

ફ્રાન્સ અને ભારતે પોતાના ભંડારને ક્રમશ ૩૦૦ અને ૧૪૦ પર જાળવી રાખ્યો છે. વિકસિત અને પરમાણુ હથિયારોને લઇને મોટા ભાગના દેશ પોતાના શસ્ત્ર-સરંજામને આધુનિક બનાવવાનો પ્રયાસ કરી રહ્યા છે. હવે તેમણે ટેકનિકલ વોર પર ધ્યાન આપવાનું શરૂ કર્યું છે. ન્યુક્લિયર વોર હેડસ રાખવા માટે ડિટેરેન્સની કલાસિક સ્ટ્રેટેજી હવે માન્ય લાગતી નથી.