માત્ર દોઢ-બે વર્ષનું બાળક જ્યારે મોબાઈલ ફોન પર ફટાફટ આંગળીઓ ફેરવે છે ત્યારે તેના મા-બાપ બહુ ગર્વથી કહેતા હોય છે કે, જુઓ અમારું બાળક કેટલું હોશિયાર છે. તે મોબાઈલમાં કેવા જોરદાર ફીચર અપડેટ કરે છે, પણ મા-બાપ એ વાતથી અજાણ હોય છે કે સ્માર્ટફોનનો નશો ડ્રગ્સ જેવો જ ખતરનાક હોય છે. બાળકોની જીદ આગળ વિવશ બનીને વાલીઓએ પછી દર વખતે તેમની આ વાત મજબૂર થવું પડે છે.
સ્માર્ટફોનનો વધારે પડતો ઉપયોગ કરતા બાળકો મોડા બોલતા શીખે છે
વિશ્વના સૌથી અમીર વ્યક્તિઓમાં સામેલ માઈક્રોસોફ્ટના બિલ ગેટ્સે તેમના બાળકોને 14 વર્ષની ઉંમર સુધી મોબાઈલ અને ટેબ્લેટથી દૂર જ રાખ્યા હતા. એપલના સ્થાપક સ્ટીવ જોબ્સે પણ એક ઈન્ટરવ્યૂમાં જણાવ્યું હતું કે, તેમણે તેમના બાળકોને ક્યારેય નાની ઉંમરે મોબાઈલ ફોન કે આઈપોડ વાપરવાની છૂટ આપી નહોતી.
મોબાઈલની સાઈડ ઈફેક્ટ્સ ખુબ ચોંકાવાનારી છે. જે બાળકો સ્માર્ટફોનનો વધુ પડતો ઉપયોગ કરે છે તે અન્ય બાળકોની સરખામણીએ મોડા બોલવાનું શરૂ કરે છે. છ મહિનાથી બે વર્ષના 900 બાળકો પર કરવામાં આવેલા એક સર્વેમાં આ આંખ ખોલતી હકીકત સામે આવી છે.
સ્નેપચેટ અને ઈન્સ્ટાગ્રામ પર મેસેજ મોકલવાની લત નશા સમાન
લંડનમાં એક એજ્યુકેશન કોન્ફરન્સ દરમિયાન વિશ્વના જાણીતા હાર્લે સ્ટ્રીટ ક્લિનિકના ડાયરેક્ટર મેન્ડી સેલીગરીએ તો ત્યાં સુધી કહ્યું હતું કે, બાળકોને સ્માર્ટફોન આપવો એ તેમને એક ગ્રામ કોકેન આપવા બરાબર જ છે. તેમણે વાલીઓને ચેતવણી આપી હતી કે, સેન્પચેટ અને ઈન્સ્ટાગ્રામ પર સતત દોસ્તોને મેસેજ મોકલવાની આદત બાળકો અને યુવાનોમાં ડ્રગ્સના નશા સમાન ગંભીર છે. ધીમેધીમે તેની અનેક આડઅસરો જોવા મળે છે.
હિંસક વીડિયો ગેમ બાળકોને બનાવે છે 'અસંવેદનશીલ'
સંશોધકોનો દાવો છે કે, સ્માર્ટફોનના વધારે પડતા ઉપયોગથી બાળકોમાં ડિપ્રેશન, એટેચમેન્ટ ડિસઓર્ડર, એંગ્ઝાઈટી જેવી અનેક બીમારીનો ખતરો વધી જાય છે. મોબાઈલ ફોનમાં ખતરનાક અને હિંસક વીડિયો ગેમ બાળકોને સાવ અસંવેદનશીલ બનાવી દે છે. સ્માર્ટફોનમાં સતત હિંસક વીડિયો ગેમ રમનારા બાળકો માનવા લાગે છે કે, હિંસાત્મક વલણ અપનાવીને જ તેઓ કોઈ પણ સમસ્યાનું સમાધાન શોધી શકે છે.