રાજકોટની 17 વર્ષની સગીરાના ગર્ભપાતની અરજી પર સુનાવણી કરતાં ગુજરાત હાઈકોર્ટે જુના જમાનાનું ઉદાહરણ આપીને વકીલોને શાંત પાડ્યાં હતા.
રાજકોટની સગીરાના ગર્ભપાતની અરજી પર ગુજરાત HCમાં સુનાવણી
સગીરાના ગર્ભપાતના પિતાના આગ્રહ પર બગડ્યાં જજ
બોલ્યાં પહેલા પણ 17 વર્ષની ઉંમરે છોકરીઓ મા બની જતી હતી
રાજકોટના પિતાની સગીર પુત્રીના ગર્ભપાતની ઉતાવળ જોઈને ગુજરાત હાઈકોર્ટના જજ બરાબરના બગડ્યાં હતા. ગુજરાત હાઈકોર્ટમાં આજે રાજકોટની સગીરાના ગર્ભપાતનો એક કેસ આવ્યો હતો જેમાં પિતાએ 17 વર્ષીય સગીરાના 7 મહિનાના ગર્ભને પાડી દેવાની અરજી કરનાર પિતાને ઠપકો આપીને જુના જમાનાનું ઉદાહરણ આપ્યું હતું. જસ્ટીસ સમીર જે દવેએ કહ્યું કે ભૂતકાળમાં છોકરીઓ 14-15 વર્ષની ઉંમરે પરણી જતી હતી અને 17 વર્ષની વયે માતા બની જતી હતી. વકીલે તબીબી રીતે ગર્ભાવસ્થા સમાપ્ત કરવા માટે દબાણ કર્યું હોવાથી, જસ્ટીસ સમીર જે દવેએ અવલોકન કર્યું હતું કે, જુના જમાનામાં તો છોકરીઓ માટે 14-15 વર્ષની ઉંમરે લગ્ન કરવા અને 17 વર્ષની ઉંમર પહેલાં બાળક હોવું સામાન્ય હતું. જજે કહ્યું કે તમને તેની ખબર નહીં તેથી તમારે મનસ્મૃતિ વાંચવી જોઈએ.
ગર્ભ અને છોકરીની સ્થિતિ સારી હોય તો ગર્ભપાતની મંજૂરી નહીં મળે
સગીર બાળકીના પિતા તરફથી હાજર થયેલા સિનિયર એડવોકેટ સિકંદર સૈયદે વહેલી તકે સુનાવણી માટે કોર્ટ સમક્ષ અપીલ કરી હતી કારણ કે ડિલિવરીની અપેક્ષિત તારીખ 18 ઓગસ્ટ હતી. જોકે, જસ્ટીસે સ્પસ્ટ કહ્યું કે જો ગર્ભ અને છોકરી બંનેની સ્થિતિ સારી હોય તો તે ગર્ભાવસ્થા સમાપ્ત કરવાની મંજૂરી નહીં મળી શકે.
15 જુને ચુકાદો જાહેર કરશે હાઈકોર્ટ
કોર્ટે સગીરાની મેડિકલ તપાસ કરવાનો આદેશ આપ્યો છે. કોર્ટે સિવિલ હોસ્પિટલ, રાજકોટના મેડિકલ સુપ્રિટેન્ડેન્ટને તાત્કાલિક ધોરણે સિવિલ હોસ્પિટલના તબીબોની પેનલ મારફતે સગીર બાળકીની તબીબી તપાસ કરવા પણ આદેશ કર્યો છે. ડોકટરોની પેનલ પોતાનો અહેવાલ રજૂ કર્યા પછી જ કોર્ટ આ અરજી પર નિર્ણય લેશે. કોર્ટે આ મામલે આગામી સુનાવણી 15 જૂને મુલતવી રાખી છે.
શું હતી ઘટના
રાજકોટની સગીરા પર રેપ થતા તે ગર્ભવતી હતી. સગીરાને સાતમો મહિનો ચાલતો હતો ત્યારે તેના પિતાને આ વાતની ખબર પડતાં તેમણે હાઈકોર્ટમાં અરજી કરીને સગીરાના ગર્ભપાતની મંજૂરી માગી હતી જેની પર આજે સુનાવણી ચાલી હતી, જેના જવાબમાં હાઈકોર્ટે તેમને કહ્યું હતું ભૂતકાળમા પણ છોકરીઓ 17 વર્ષે મા બની જતી હતી.