સુરત સિટી બસના ચાલકની ચુકે યુવતીના બંને પગ કચડાયા છે. યુવતી હાલ સિવિલ હોસ્પિટલમાં સારવાર હેઠળ છે. પરિવારે ન્યાય માટે પોલીસ કમિશનરને ફરિયાદ કરી છે.
સુરતમાં બસએ યુવતીના પગ કચડી નાખ્યા
ઉતરતી વખતે ડ્રાઈવરે અચાનક જ બસ ચાલુ કરી દીધી
સિટી બસ ચાલકની ચુકે યુવતીના બંને પગ કચડાયા
પરિવારે ન્યાય માટે પોલીસ કમિશનરને ફરિયાદ કરી
સુરતમાં સિટી બસ ચાલકોની બેદરકારીને કારણે અકસ્માતોમાં દિવસે દિવસે વધારો નોંધાઈ રહ્યો છે, ત્યારે વધુ એક હચમચાવતી અકસ્માતની ઘટના સુરતમાંથી સામે આવી છે. યુવતી બસમાંથી ઉતરે તે પહેલા જ ડ્રાઇવરે બસ ભગાવી મૂકતા યુવતીના બંને પગ પર બસના પૈડા ફરી વળ્યા હતા. જેના કારણે તેને સારવાર માટે હોસ્પિટલમાં ખસેડવાની ફરજ પડી હતી. એવું કહેવામાં આવી રહ્યું છે કે આ બનાવ આજથી સાત દિવસ અગાઉ બન્યો છે.
યુવતીના બંને પગ કચડાયા
પાંડેસરા વિસ્તારની અર્ચના નામની મહારાષ્ટ્રીયન યુવતી અકસ્માતનો ભોગ બની છે. સિટી બસના ચાલકે યુવતી બસમાંથી નીચે ઉતરે તે પહેલા જ બસ ભગાવી મૂકતા યુવતી નીચે પટકાઈ હતી. જે બાદ યુવતીના બંને પગ બસના ટાયર નીચે આવી ગયા હતા. સિટી બસ ચાલકની ચુકે યુવતીના બંને પગ કચડાયા હતા.
સારવાર માટે ખસેડાઈ હોસ્પિટલમાં
અકસ્માતની ઘટના બાદ યુવતીને સારવાર માટે હોસ્પિટલ ખાતે ખસેડવામાં આવી છે. જેની હાલ સિવિલ હોસ્પિટલમાં સારવાર હેઠળ છે. ઝડપથી દોડેલી બસે યુવતીના જીવનની રફ્તાર પર બ્રેક મારી દીધી છે. આ મામલે ખટોદરા પોલીસે તપાસ હાથ ધરી છે.
પરિવારે ન્યાયની કરી માંગ
પરિવારે ન્યાય માટે પોલીસ કમિશનરને અરજી કરી છે. એવું કહેવામાં આવી રહ્યું છે કે, અકસ્માતનો ભોગ બનેલી યુવતી માતા-પિતા અને માનસિક અસ્વસ્થ ભાઈનો આધારસ્તંભ છે. અકસ્માતનો ભોગ બનેલી યુવતીને સાજા થવામાં પાંચ-છ માસનો સમય લાગે તેવું દેખાઈ રહ્યું છે.
ગત સપ્ટેમ્બરમાં વિદ્યાર્થીને લીધો હતો અડફેટે
ગત સપ્ટેમ્બર મહિનામાં પણ આવો જ બનાવ બન્યો હતો. સુરતના પાંડેસરા વિસ્તારમાં સિટી બસમાં ચડવા જતા એક વિદ્યાર્થીનો પગ લપસી પડ્યો હતો. જેથી આ વિદ્યાર્થી બસની નીચે કચડાઇ ગયો હતો. જે બાદ તેને ગંભીર ઈજા પહોંચતા સારવાર અર્થે હોસ્પિટલ ખસેડવામાં આવ્યો હતો. જ્યાં ટૂંકી સારવાર બાદ તેનું મોત થયું હતું. જે બાદ પરિવારે ડ્રાઈવરની ધરપકડ ન થાય ત્યાં સુધી વિદ્યાર્થીનો મૃતદેહ ન સ્વીકારવાનું નક્કી કર્યું હતું જેને લઇને પોલીસ દોડતી થઇ હતી અને મોડી રાત્રે પોલીસે ગુનો નોંધી ડ્રાઇવરની ધરપકડ કરી વધુ તપાસ હાથ ધરી હતી.