જીવનું જોખમ / કારની ડેકીમાં ગુજરાતની દીકરીઓ, શાળાએ જવા ST બસ બંધ થતાં મજબૂરી, દુર્ઘટના થઈ તો જવાબદાર કોણ?

• બોટાદના રાજપરા ગામની વિદ્યાર્થિનીઓનો વીડિયો વાયરલ
• કારની ડેકીમાં બેસીને શાળાએ જતી વિદ્યાર્થિનીઓનો વીડિયો વાયરલ
• વિદ્યાર્થિનીઓ ખાનગી વાહનોની ડેકીમાં બેસી શાળા જવા મજબૂર

વિકાસ અને શિક્ષણની ફુલગુલાબી વાતો વચ્ચે અનેક વખત તંત્રની પોલ ઉઘાડી પડી છે ત્યારે આવો જ એક કિસ્સો સામે આવ્યો છે. જેમાં બોટાદ જિલ્લાના રાજપરા ગામની વિદ્યાર્થિનીઓનો વીડિયો સોશિયલ મીડિયામાં વાયરલ થયો છે.  ST બસ સમયસર ન આવતી હોવાથી વિદ્યાર્થિનીઓ અભ્યાસ માટે કારની ડેકીમાં બેસી આવાગમન કરવા મજબુર બની છે. રાજપરા અને હામાપર ગામમાં ઉચ્ચ શિક્ષણની સુવિધાનો અભાવ હોવાથી વિદ્યાર્થીઓ અભ્યાસ અર્થે ગોરડકા સહિતના અન્ય ગામે જાય છે જાય છે. પરંતુ અહીં પરિવહનની ખાસ સુવિધા ન હોવાથી વિદ્યાર્થીઓ નછૂટકે જોખમી સવારી કરી રહ્યા છે.

વિદ્યાર્થિનીઓએ આક્ષેપ સાથે જણાવ્યું કે...
અભ્યાસ માટે ગામથી દુર જતા વિદ્યાર્થીઓ આવવાજવા માટે એસટી બસ સહિતના સરકારી સાધનો ન મળતા વિધાર્થિની ખાનગી વાહનોનો સહારો લઈ રહ્યા છે. તેમાં પણ વાહન ચાલકો મજબૂરીનો લાભ લેતા હોવાનો વીડિયો સામે આવ્યો છે. વીડિયોમાં દ્રશ્યમાન થતી વિગત અનુસાર જગ્યાના અભાવે વિદ્યાર્થિનીઓ કારની ડેકીમાં બેસીને અભ્યાસમાં માટે શાળાએ જઇ રહી હોવાનું જણાય રહ્યું છે. ST બસ સમયસર ન આવતી હોવા ઉપરાંત ડ્રાઇવર-કંડકટર મનમાની ચલાવી બસ ઉભી ન રાખતા હોવા સહિતના દિકરીઓએ આરોપ લગાવ્યા હતા. 

સરકાર દ્વારા એસટી બસ ફાળવવામાં આવે તેવી માંગ

આથી રાજપરા અને હામાપર ગામના વિદ્યાર્થીઓ  અભ્યાસને ધ્યાનમા લઈને સરકાર દ્વારા એસટી બસ ફાળવવામાં આવે તેવી વિદ્યાર્થીઓ અને વાલીઓ માંગ ઉઠાવી રહ્યા છે. એટલું જ નહિ આ મામલે તંત્રને અનેક વખત રજૂઆત કરવા છતાં આજ દિવસ સુધી સમસ્યાનો હાલ ન આવ્યો હોવાનો પણ સ્થાનિક લોકોએ દાવો કર્યો હતો. આથી વાલીઓમાં પણ રોષ જોવા મળી રહ્યો છે. જો દુર્ઘટના થાય તો જવાબદાર કોણ? શું તંત્ર દુર્ઘટનાની જબાબદારી લેશે ? તેવા અણીયારા સવાલો વાલીઓ ઉઠાવી રહ્યા છે.