અમદાવાદના નિકોલમાં રહેતી યુવતીને અન્ય ઘર્મના યુવક સાથેના પ્રેમલગ્ન ભારે પડ્યા છે. લગ્નના થોડા સમય બાદ પતિ અને સાસુએ નિશાને નમાઝ પઢવા માટે અવારનવાર હેરાન કરવાની શરૂ કરી.
નિકોલની યુવતીને અન્ય ધર્મના યુવક સાથે લગ્ન કરવા પડ્યા ભારે
લગ્નના થોડા સમય બાદ પતિ અને સાસુએ નિશાને હેરાન કરી
યુવતીએ અમદાવાદમાં સાસરીયા પક્ષ સામે નોંધાવી ફરિયાદ
અમદાવાદના નિકોલમાં રહેતી યુવતી ઉત્તરપ્રદેશના આગ્રામાં આવેલી ઓબેરોય હોટલમાં રિસેપ્શનિસ્ટ તરીકે નોકરી કરતી હતી, જે સમયે તેની સાથે કામ કરતા ખાલીદઅલી ઉર્ફે આદીલઅલી સાથે મિત્રતા થતા 2014માં કોર્ટ મેરેજ કર્યા હતા.
લગ્નના થોડા સમય પછી નિશાને પતિ આદીલખાને નોકરી છોડાવી હતી અને સાસુ નસીમબેગમ દ્વારા નિશાને નમાઝ પઢવા અને કુરાન પઢવા બાબતે અવારનવાર ટોણા મારી હેરાન કરાતી હતી. એક દિવસ યુવતીએ પતિ આદીલખાનનો મોબાઈલ ચેક કરતા અનેક સ્ત્રીઓ સાથે સંબંધ ધરાવતો હોવાના ફોટો અને કોલ રેકોર્ડિંગ મળી આવ્યા હતા. જેથી યુવતી ગભરાઈ જતા અમદાવાદ આવી હતી.
જે બાદ તેણે પતિને આ મામલે ફોન કરી પુછતા તેણે ધમકી આપી જણાવ્યું હતું કે હાલમાં ઉત્તરપ્રદેશમાં ઈલેક્શન છે એટલે મારી બંદુક પોલીસ સ્ટેશન ખાતે જમા છે, જે મારી બંદુક મારી પાસે પરત આવી જાય એટલે હું તને અને તારી માતાને જોઈ લઈશ. યુવતીનો પતિ ખૂબ જ માથાભારે હોય અને અસામાજીક તત્વો સાથે સંબંધો ધરાવતો હોવાથી આ મામલે નિકોલ પોલીસ સ્ટેશનમાં પતિ આદીલખાન સહિત સાસુ અને નણંદ, જેઠ સામે ઘરેલુ હિંસા અને ધમકી અંગે ફરિયાદ નોંધાવતા પોલીસે ગુનો નોંધી તપાસ શરૂ કરી છે.