વડોદરા પંથકમાં પાણીની ટાંકીમાં પડી જતા માસૂમ બાળકીનું મોત નીપજ્યું હોવાનું સામે આવ્યું છે.
વડોદરામાં 3 વર્ષની બાળકીનુ ટાંકીમાં પડી જતા મોત
પાણીની અંડરગ્રાઉન્ડ ટાંકીમાં પડી જતા નીપજ્યું મોત
હેતાંશી નામની બાળકી રમતા રમતા પાણીની ટાંકીમાં પડી
વડોદરામાં માતા-પિતા માટે ચેતવણીરૂપ કિસ્સો પ્રકાસમાં આવ્યો છે. વડોદરાના પાદરા ખાતે 3 વર્ષની બાળકી પાણીની ટાંકીમાં પડી જતા મોત નીપજ્યું છે. આ ઘટનાને લઈને અરેરાટી વ્યાપી ગઈ છે.વ્હાલસોઈ બાળકી રમતા-રમતા અકસ્માતે ટાંકીમાં પડી ગઈ હોવાની પરિવારજનોને થોડા સમય બાદ જાણ થઈ હતી. જેને લઈને ભાગદોળ મચી જવા પામી હતી.
ઘરની અંદરના ભાગમાં આવેલ અંડરગ્રાઉન્ડ પાણીની ટાંકીમાં પડી બાળકી
આ કરુણાંતિકાની જાણવા મળતી વિગત અનુસાર વડોદરાના પાદરા વિસ્તારમાં આવેલ કરિશ્મા સોસાયટીમાં રહેતા પરિવારની 3 વર્ષની બાળકી ઘરમાં રમી રહી હતી. હેતાંશી નામની આ બાળકી રમતા રમતા ઘરની અંદરના ભાગમાં આવેલ પાણીની અંડરગ્રાઉન્ડ ટાંકી પાસે પહોંચી ગઈ હતી. જ્યાં પરિવારજનોની જાણ બહાર અચાનક પાણીની ટાંકીમાં ખાબકી હતી. જે અંગે થોડી વાર બાદ પરિવારજનોને જાણ થઈ હતી. આથી બાળકીના માતા-પિતા સહિતના ઘરના સભ્યોએ આજુબાજુના રહેવાશીઓને જાણ કરતાં લોકો દોડી આવ્યા હતા અને પાડોશીઓની મદદથી બાળકીને બહાર કાઢવામાં આવી હતી.
માસૂમ બાળકીના મોતને પગલે પરિવાર શોકના સાગરમાં ડૂબ્યો
ફૂલ જેવી માસૂમ બાળકીને ટાંકીમાંથી બહાર કાઢવામાં સમય લાગી જતા પાણી પી જવાથી અને ગૂંગણામણને કારણે બાળકી ગંભીર બની હતી જેને સારવાર અર્થે તાત્કાલિક હોસ્પિટલ ખાતે ખસેડવામાં આવી હતી. જ્યાં તેનું મોત નીપજ્યું હોવાનું ફરજ પરના તબીબે જાહેર કર્યું હતું. આ મામલે પોલીસે અકસ્માતે મોત અંગેનો ગુન્હો નોંધી કાર્યવાહી હાથ ધરી છે. આમ માતા-પિતાની એક ભૂલથી માસૂમનો જીવ જતા ચકચાર મચી છે. માતા-પિતાની આંખ ઉઘાડનાર આ કિસ્સાને લઈને પરિવાર શોકના સાગરમાં ડૂબ્યો છે.