ઉપરથી મોત ત્રાટક્યું / VIDEO : મોતને ક્યાં લેવા જવું પડે છે? પાંચમા માળેથી કૂતરો પડતાં માસૂમ કચડાઈ મરી

કયા માર્ગે મોત આવશે તેની કોઈને ખબર નથી. હવે જોવોને બિલ્ડિંગના ઊંચા માળેથી પટકાયેલા કૂતરાએ 3 વર્ષની બાળકીને મારી નાખી. કલ્પ્યું ન હોય તેવું મોત કહેવાયને આ? મુંબઈને અડીને આવેલા થાણેમાં એક ત્રણ વર્ષની બાળકીનું એક કરુણ અકસ્માતમાં મોત થયું હતું. મહિલા જ્યારે 3 વર્ષની બાળકીને લઈને જઈ રહી હતી ત્યારે તેની ઉપર આવેલી બિલ્ડિંગના પાંચમા માળેથી એક પેટ ડોગ પટકાયો હતો જેની નીચે આવી જતાં બાળકીનું મોત થયું હતું.

પેટ ડોગના વજન નીચે દબાઈ માસૂમ

આ ઘટનાનો એક વીડિયો થાણે જિલ્લાના મુંબ્રા વિસ્તારના અમૃત નગરમાંથી સામે આવ્યો છે. વીડિયોમાં ત્રણ વર્ષની બાળકી એક મહિલા સાથે રસ્તા પર ચાલતી જોવા મળે છે. બાળકી અમૃત નગરમાં ચિરાગ મેસન બિલ્ડીંગ નજીકથી પસાર થવા લાગે છે કે તરત જ પાંચમા માળેથી એક કૂતરો નીચે રસ્તા પર ચાલી રહેલી માસૂમ બાળકી પર પડી જાય છે. વીડિયોમાં જોઈ શકાય છે કે કૂતરો છોકરી પર પડ્યો પછી આજુબાજુના લોકો એક ક્ષણ માટે ચોંકી ગયા, શું થયું. પછી બીજી જ ક્ષણે, તેની સાથે ચાલી રહેલી મહિલા રસ્તા પર પડી ગયેલી છોકરીને તેના ખોળામાં ઉપાડે છે અને દોડવા લાગે છે. વીડિયોમાં જોવા મળી રહ્યું છે કે એક ભારે કૂતરો તેના પર પડતાં બાળકી બેભાન થઈ ગઈ હતી.

કૂતરાનો વાળ પણ વાંકો ન થયો

ઘટનામાં ચોંકાવનારી વાત એ છે કે 5મા માળેથી પટકાયાં હોવા છતાં પણ પેટ ડોગને કંઈ થયું નહોતું. કૂતરો થોડીવાર નીચે પડ્યો રહ્યો, ત્યારબાદ તે ઉભો થઈ ગયો અને ધીમે ધીમે ત્યાંથી જતો રહ્યો જોકે તેને નજીવી ઈજા પહોંચી હતી તેની પણ સારવાર કરાવાઈ હતી.

કૂતરા જાતે પડ્યો કે કોઈએ ધકેલ્યો

આ ઘટનામાં કૂતરો આખરે પડ્યો કઈ રીતે તે પણ તપાસનો વિષય છે, તે જાતે પડ્યો હતો કે કોઈએ તેને ઉપરથી ફેંક્યો હતો. આટલી ઊંચાઈએથી કૂતરો પડ્યો કેવી રીતે તેની પણ પોલીસ તપાસ કરી રહી છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ