આપઘાત! / 'કોઈ પીછો કરી રહ્યું છે...' યુવતીના મેસેજ બાદ સવારે વલસાડ ટ્રેનના કોચમાં ગળેફાંસો લગાવેલી હાલતમાં મળ્યો મૃતદેહ

• ગુજરાત ક્વિન ટ્રેનના કોચમાં યુવતીએ ગળેફાંસો લગાવી કર્યો આપઘાત  
• કોઈ પીછો કરતું હોવાનો યુવતીએ OASIS સંસ્થાને કર્યો હતો મેસેજ
• પીડિતા સંસ્થાના કામે એક શિક્ષકને મળવા જવાનું કહી ઘરેથી નીકળી હતીઃ માતા
• પીડિતા ધોરણ 10માં જિલ્લામાં પ્રથમ ક્રમે થઇ હતી પાસઃ પિતા

વલસાડ રેલવે સ્ટેશન પર મોડીરાત્રે ગુજરાત ક્વિન ટ્રેનના કોચમાં ગળેફાંસો લગાવીને 18 વર્ષિય યુવતીએ આત્મહત્યા કરી હોવાનો બનાવ સામે આવ્યો છે. મૃતક યુવતી નવસારીના જલારામ નગર વિસ્તારની રહેવાસી છે. વડોદરાની કોલેજમાં પ્રથમ વર્ષમાં અભ્યાસ કરતી હતી. પાંચ દિવસ અગાઉ જ વડોદરાથી નવસારી ઘરે આવી હતી. અભ્યાસની સાથે એક સામાજિક સંસ્થામાં પણ કામ કરતી હતી. 

સફાઈ કામદારે કોચમાં યુવતીને ફાસો ખાધેલી હાલતમાં જોઈ હતી

ગુજરાત ક્વિન ટ્રેનના કોચમાં સફાઈ કામદારે યુવતીને ફાસો ખાધેલી હાલતમાં જોઈ હતી. ત્યારબાદ તાત્કાલિક સ્ટેશન માસ્તર અને ગુજરાત રેલવે પોલીસને જાણ કરાઈ હતી. આ યુવતી પાસેથી ટીકીટ કે કંઇ નહોતું મળ્યું. યુવતી પાસેથી મળેલા મોબાઈલ ફોન પરથી યુવતીની ઓળખ થઇ હતી. ત્યારબાદ પોલીસ દ્વારા તેમના પરિવારને બોલાવવામાં આવ્યો હતો.

કોઈ પીછો કરતું હોવાનો યુવતીએ OASIS સંસ્થાને કર્યો હતો મેસેજ

વધુ તપાસ બાદ એવી માહિતી સામે આવી છે કે, યુવતીએ OASIS સંસ્થાને મેસેજ કર્યો હતો કે તેનો કોઈ પીછો કરી રહ્યું છે. આ સંસ્થા દ્વારા સવારે મેસેજ રીડ કરવામાં આવ્યો હતો. ત્યારે હવે તેનો પીછો કોણ કરતું હતું અને શા માટે કરતું હતું તે અંગે વધુ તપાસ હાથ ધરવામાં આવી છે. પોલીસ દ્વારા મરોલી રહેતા શિક્ષકનો સંપર્ક કરીને વધુ તપાસ હાથ ધરવામાં આવી છે. હાલ રેલવે પોલીસે યુવતીના આપઘાતને લઇ વધુ તપાસ હાથ ધરી છે. જોકે માનસી ગુપ્તાના આપઘાત પાછળનું કારણ હજુ સુધી જાણવા મળ્યું નથી. આગામી સમયમાં યોગ્ય તપાસ થાય તો યુવતીના આપઘાતના કારણમાં અન્ય ખુલાસા થઇ શકે છે.

પીડિતા સંસ્થાના કામે એક શિક્ષકને મળવા જવાનું કહી ઘરેથી નીકળી હતીઃ માતા

પીડિતાની માતાએ જણાવ્યું હતું કે, માનસી સંસ્થાના કામે એક શિક્ષકને મળવા જવાનું કહી ઘરેથી નીકળી હતી. તો યુવતીના પિતાએ કહ્યું કે, માનસી ભણવામાં હોશિયાર હતી અને ધોરણ 10માં તે જિલ્લામાં પ્રથમ ક્રમે પાસ થઇ હતી. 

પીડિતા લોકોને આત્મહત્યા ન કરવા માટે જાગૃત કરતી હતી અને પોતે આ પગલું ભરતા ચકચાર

મળતી માહિતી અનુસાર,પીડિતા સામાજિક સંસ્થા ફેલોશીપ માટે કામ કરતી હતી. આ સંસ્થા થકી લોકો અને વિદ્યાર્થીઓ આત્મહત્યાના પગલાં ન ભરે તેને લઇને જાગૃત કરવામાં આવતા હતા. ત્યારે હવે માનસીએ જ આવું પગલું ભરી લેતા પરિવારજનો આઘાતમાં મુકાયા છે.