ગીરસોમનાથમાં પોલીસે દારૂની બાતમીના આધારે બાલાજી બિલ્ડીંગમાં દરોડા પાડ્યા હતા. વ્યાજખોર અશોક જેઠવાને ત્યાં પોલીસે દરોડા પાડ્યા હતા. દરોડા પાડીને પોલીસે અશોક જેઠવાના ત્યાંથી 45 લાખ રૂપિયા રોકડા અને 20 લાખના સોનાના દાગીના મળી આવ્યા હતા.
સંખ્યાબંધ ATM કાર્ડ વાહનોની RC બુક ચલણી નોટ ગણવાનું મશીન નાણા ધીરવાની યાદી બુક પણ મળી હતી. આ ઉપરાંત વિદેશી દારૂની 48 બોટલ પણ મળી આવી હતી. પોલીસે ઈન્કમટેક્સ વિભાગને જાણ કરી હતી. દરોડા પડતા વ્યાજખોર અશોક જેઠવા ફરાર થયો હતો. ત્યારે હવે પોલીસે તમામ મુદ્દામાલ જપ્ત કરીને આગળની કાર્યવાહી હાથધરી છે.
આ મામલે મળતી માહિતી મુજબ વેરાવળમાં પોસ્ટઓફિસ નજીક આવેલી બાલાજી બીલ્ડીંગમાં દારૂ છુપાવ્યો હોવાની વેરાવળ સીટી પીઆઈ બી.બી.કોળીને બાતમી મળી હતી.સ્ટાફ સાથે પોલીસ જ્યારે સ્થળ પર પહોચી ત્યારે સંચાલક અશોક જેઠવાને ગંધ આવી જતાં તે નાસી ગયો. પરંતુ પોલીસે દારૂની બાતમીનાં આધારે ખાલી મકાનમાં તપાસ શરૂ કરી હતી. પ્રારંભે દારૂની એક બોટલ મળતાં પોલીસે વધુ તપાસ શરૂ કરતાં પોલીસ અચંબામાં પડી ગઇ હતી. સ્થળ પરથી 45 લાખની ચલણી નોટો અને 800 ગ્રામ જેટલા સોનાનાં દાગીના મળી આવ્યા હતા.
આ સાથે જ સંખ્યા બંધ એ.ટી.એમ. ડેબીટ કાર્ડ અને કોરા ચેક તેમજ વાહનોની આરસી બુકો તથા ચલણી નોટો ગણવાનું મશીન મળી આવ્યું હતું. સાથે વિવિધ લખાણ સાથેની એક ડાયરી કે જેમાં કોને કેટલા પૈસા આપ્યા..? લેવા ના બાકી..? વગેરે માહીતી મળી આવી હતી.
ત્યારે પોલીસને માહીતી મળી હતી કે અશોક જેઠવા ગેરકાયદે મોટા વ્યાજે ધીરધારનો ધંધો કરે છે. પોલીસે હાલ તમામ રોકડ સહીત મુદ્દામાલ કબ્જે લઈ ઈન્કમટેક્ષ વિભાગને પણ જાણ કરતાં તપાસનો ધમધમાટ શરૂ થયો છે. આથી શહેર ભરમાં ગેરકાયદે વ્યાજખોરોમાં ફફડાટ મચી જવા પામ્યો છે. હાલ પોલીસ આરોપીને શોધવા મથી રહી છે.