આરોપ / ગીર સોમનાથના ધારાસભ્યએ DGPને લખ્યો પત્ર, દારૂ અને ડ્રગ્સનું ખુલ્લેઆમ વેચાણનો આક્ષેપ

રાજ્યમાં દારૂ પર સંપૂર્ણ પ્રતિબંધ છે, છતા પણ અવાર નવાર દારૂ ઝડપાવું તેમજ દારૂ પીધેલી હાલમાં લોકો મળી આવવી એ સામાન્ય બાબત જેવું થઈ ગયુ હોય તેવું જણાય છે, ત્યારે આ બધાની વચ્ચે વેરાવળના ધારાસભ્ય વિમલ ચુડાસમાએ દારૂ અને જુગારધામને લઈ ગંભીર આરોપ કર્યો છે તેમજ સ્થાનિક પોલીસ પર પણ ગંભીર આક્ષેપ કર્યો છે.

દારૂને લઈ વિમલ ચુડાસમાનો ગંભીર આરોપ

ધારાસભ્ય વિમલ ચુડાસમાનો આક્ષેપ છે કે, વેરાવળ, ભીડીયા, પાટણમાં ખુલ્લેઆમ દેશી દારૂ અને જુગારધામ ધમધમી રહ્યો છે. જે મુદ્દે તેમણે DGP અને ગૃહમંત્રીને પત્ર પણ લખ્યો છે. જે પત્રમાં ઉલ્લેખ કર્યો છે કે, ગલીઓમાં ક્રિકેટના સટ્ટા રમાય છે. વધુમાં પત્રમાં જણાવ્યું છે કે, SPને રજૂઆત કરવા છતાં દારૂનો વેપલો અને જુગારધામ સામે કાર્યવાહી શૂન્ય છે. નશા અને ક્રિકેટ સટ્ટાના રવાડે યુવાધન ચઢી રહ્યું હોવાની પત્રમાં ચિંતા વ્યક્ત કરી છે. સ્થાનિક પોલીસની રહેમ નજર હેઠળ જુગારધામ, દારુના વેપલા ચાલતા હોવાનો પણ આરોપ કર્યો છે.

વાંચવા જેવું: ગુજરાત પોલીસને મોટી સફળતા, કચ્છમાંથી એક જ અઠવાડિયામાં 61 કરોડથી વધારેનું ડ્રગ્સ ઝડપ્યું

'એસપીને રજૂઆત કરી હતી'

તેમણે કહ્યું કે,મને લોકો દ્વારા રજૂઆત કરવામાં આવતા મેં આ મુદ્દે એસપીને રજૂઆત કરી હતી. જો કે, એસપીએ જણાવ્યું હતું કે, આ મુદ્દે કાર્યવાહી કરાશે. વધુમાં લોકલ પોલીસની મીઠ્ઠી નજર હેઠળ દારૂ, જુગારધામ સહિતની ગેરકાયદે પ્રવૃત્તિઓ ચાલી રહી છે. વધુમાં કહ્યું કે, જો આ બાબતે કાર્યવાહી નહી કરાય તો આગામી દિવસોમાં ગાંધી ચીધ્યા માર્ગે આંદોલન કરવામાં આવશે