ગીર સોમનાથમાં 24 કલાકમાં 8 ઈંચ વરસાદથી જળબંબાકાર વાજડી ગામ બન્યું સપર્ક વિહોણું

ગીર સોમનાથઃ રાજ્યમા મેઘાની મહેર જોવા મળી. ત્યારે રાજ્યમાં મોસમનો કુલ 26.70 ટકા વરસાદ નોંધાયો છે. દક્ષિણ ગુજરાતમાં મોસમનો 44 ટકા સૌરાષ્ટ્રમાં 19.489 ટકા મધ્ય અને પૂર્વ ગુજરાતમાં 22 ટકા વરસાદ નોંધાયો છે. જ્યારે સૌથી ઓછો વરસાદ ઉત્તર ગુજરાતમાં નોંધાયો. ઉત્તર ગુજરાતમાં માત્ર 12 ટકા જ વરસાદ નોંધાયો છે.  

ગીરસોમનાથમાં 24 કલાકમાં 8 ઈંચ વરસાદથી જળબંબાકારની સ્થિતિ
ગીરમાં છેલ્લા 3 દિવસથી સતત વરસાદ વરસી રહ્યો છે. ગીર સોમનાથના સુત્રાપાડા કોડીનાર અને ગીર ગઢડામાં ધોધમાર વરસાદમાં ધોધમાર વરસાદ પડ્યો છે. ભારે વરસાદના કારણે ખેતરો બેટમાં ફેરવાયા છે. ખેતરોમાં પાણી ભરાવાના કારણે ખેડૂતોને પાક નિષ્ફળ જાય ભીતી છે. ભારે વરસાદના કારણે અનેક વિસ્તારોમાં પાણી ભરાયા છે. જેના કારણે સ્થાનિકો પરેશાન થયા છે.

જિલ્લામાં છેલ્લા 24 કલાકમાં 8 ઈંચ જેટલો વરસાદ ખાબકયો છે. ભારે વરસાદના કારણે નાના અનેક ગામો બેટમાં ફેરવાયા છે. ભારે વરસાદના કારણે માણેકપુર રોડ પર રાવલ નદીનું પાણી આવતા લોકો પરેશાન થયા છે. જિલ્લાના કોડીનાર અને સુત્રાપાડામા છેલ્લા 3 દિવસમાં 15 ઈંચ જેટલો વરસાદ ખાબક્યો છે. સાથે જ તાલાલા અને ગીરમાં પણ ભારે વરસાદ નોંધાયો છે. તાલાલાની સરસ્વતી નદી બે કાંઠે વહી રહી છે.
 
સિવિલ હોસ્પિટલમાં પાણી ભરાયા
ભારે વરસાદના પગલે વિલિગડન ડેમ ઓવરફ્લો થયો છે. તો ડેમ ઓવરફ્લો થતાં શહેરીજનોને પાણીની મુશ્કેલીથી રાહત મળી છે. તો આ તરફ જિલ્લાની નવનિર્મિત સિવિલ હોસ્પિટલમાં પાણી ભરાયા છે. હોસ્પિટલના ગ્રાઉન્ડ઼ ફ્લોરમાં વરસાદી પાણી ફરી વળતા તંત્ર દ્વારા પાણી બહાર કાઢવા કાર્યવાહી હાથ ધરાઈ હતી. ભારે વરસાદના કારણે અનેક જગ્યાએ વાહનો પાણીમાં ફસાયા હતા. શહેરભરમાં ચારે બાજુ ઘૂંટણ સમા પાણી ભરાયા હતા. 

ઉનાનું નવી વાજડી સંપર્ક વિહોણું
ઉનાનું નવી વાજડી ગામ સંપર્ક વિહોણું બન્યું છે. જ્યારે ભારે વરસાદને કારણે 10 નંબરનો પુલ તુટી ગયો જેને લઇને ગામ સંપર્ક વિહોણું બન્યું છે. જિલ્લા પંચાયતના અધિકારીઓએ ગામની મુલાકાત લીધી હતી.