માવઠું નડ્યું / કેસર કેરીના રસિયા માટે માટા સમાચાર: હજુ સુધી કેરીના બગીચાઓમાં મોર ફૂટવાની પ્રક્રિયા ન થતા ખેડૂતો મુંઝવણમાં

• ગીરમાં કેસર કેરીના ઉત્પાદનમાં મુશ્કેલી
• હજારો હેકટર જમીનમાં વાવણી
• માવઠાના કારણે ખેડૂતોને આર્થિક ફટકો

ગીરમાં પ્રખ્યાત કેસર કેરીનું ઉત્પાદન થાય છે અને હજારો હેક્ટર જમીનમાં આંબાના બગીચાઓ આવેલા છે. જોકે આ કેસર કેરીના બગીચાઓ પર ચાલુ વર્ષે ઋતુનું ગ્રહણ લાગ્યું હોય તેમ જણાઇ રહ્યું છે. કારણ કે સામાન્ય રીતે નવેમ્બર, ડિસેમ્બર અને જાન્યુવારી એમ ત્રણ તબક્કામાં આંબાના બગીચાઓમાં ફ્લાવરિંગ થવાની પ્રક્રિયા થતી હોય છે.

જોકે ઘણા ખરા બગીચાઓમાં તો દિવાળી બાદ ફ્લાવરિંગ થવા લાગે છે. પરંતુ ચાલુ વર્ષે ડિસેમ્બર અડધો માસ પસાર થવા આવ્યો હોવા છતાં હજુ પણ કેસર કેરીના બગીચાઓમાં મોર ફૂટવાની પ્રક્રિયા ચાલુ થઈ નથી. જેમને લઈ ખેડૂતો મુંઝવણમાં મુકાયા છે.

તાલાલા સહિત સમગ્ર ગીર પંથકમાં આવેલ કેસર કેરીનાં બગીચાઓમાં નવેમ્બર માસમાં મોર ફૂટની પ્રક્રિયા પ્રથમ તબક્કા સમયે જ વાતાવરણ યોગ્ય ન રહેતા અને કમોસમી વરસાદ થતા આંબાવાડીઓમાં મોર ફૂટવાની પક્રિયા અટકી પડી છે. અને જીવાતનો ઉપદ્રવ વધતા ખેડૂતોએ દવા છંટકાવ શરૂ કર્યો છે.

સામાન્ય રીતે ગીર પંથકમાં કારતક માસમાં ઠંડીનાં અભાવ વચ્ચે વાદળછાયા વાતાવરણથી અસહ્ય ઉકળાટ જોવા મળ્યો હતો. જેથી આંબાવાડીઓમાં તેની સીધી અસર જોવા મળી રહી છે. જો યોગ્ય મોરની ફૂટ જોવા ન મળે તો ઉત્પાદન પણ ઘટી શકે છે. જેથી ખેડૂતોને આર્થિક ફટકો પડી શકે તેમ છે.