જૂનાગઢમાં ગેરકાયદેસર સિંહ દર્શનના ગુનામાં હોટલ સંચાલકની ધરપકડ કરી છે. ગીર પ્રાઈડના સંચાલક મહેન્દ્રસિંહ સોલંકીની ધરપકડ કરવામાં આવી છે. વન વિભાગે 'ગીર પ્રાઈડ' હોટલને પણ સીલ માર્યું છે. વન વિભાગે કોઈ હોટલને સીલ માર્યું હોય તેવી આ પહેલી ઘટના છે.
સંચાલક મહેન્દ્રસિંહ સોલંકી સોશિયલ મીડિયામાં વિડિયો મુક્યા હતા. 999 રૂપિયામાં નાઈટ સફારી અને સિંહ જોવા માટેની ઓફર અપાતી હતી. વનવિભાગે મેંદરડા કોર્ટમાં આરોપીના રીમાન્ડની માંગ રજૂ કરી છે.
અત્રે ઉલ્લેખનીય છે કે રાજ્ય સરકાર દ્વારા સિંહોના સંવર્ધન અને સંરક્ષણ માટે રૂપિયા 350 કરોડનું પેકેજ તૈયાર કરવામાં આવ્યું છે. પેકેજ અનુસારની તમામ કામગીરી સમયમર્યાદામાં પૂર્ણ કરવા માટે વન વિભાગના અધિકારીઓને સુચના આપવામાં આવી હતી. ત્યારે મુખ્યમંત્રીએ ગીર વન અભ્યારણ્ય વિસ્તારમાં ગેરકાયદેસર સિંહ દર્શન અટકે તે માટે કડક પગલા લેવા વન વિભાગના અધિકારીઓને સૂચના આપી હતી.
મહત્વનું છે કે, રાત્રિના સમયે પ્રવેશબંધી હોવા છતાં ગીરના જંગલ વિસ્તારમાં જિપ્સીઓ અને બાઈક લઈને પ્રવેશ આપવામાં આવે છે અને સિંહ દર્શન કરાવવામાં આવી છે. ત્યારે સાસણમાં ગેરકાયદે સિંહ દર્શનના ગુનામાં હોટલ સંચાલકની ધરપકડની ઘટના સામે આવી છે.