રિલાયન્સ ઇન્ડસ્ટ્રીઝના રિટેલ વેન્ચર રિલાયન્સ રિટેલમાં સિંગાપોર સરકારનું ઇન્વેસ્ટમેન્ટ કોર્પોરેશન GIC ૧.૨૨ ટકા ભાગીદારી કુલ ૫,૫૧૨ કરોડ રૂપિયામાં ખરીદશે.
આ પહેલાં અબુધાબી સ્થિત સોવરેન ફંડ મુબાડલા ઇન્વેસ્ટમેન્ટ કંપનીએ પણ રિલાયન્સ રિટેલમાં ૬,૨૪૭.૫ કરોડ રૂપિયાના રોકાણની જાહેરાત કરી હતી.
રિલાયન્સ રિટેલ વેન્ચરમાં ૧.૪ ટકા હિસ્સો ખરીદશે
આ રોકાણ સાથે તે રિલાયન્સ રિટેલ વેન્ચરમાં ૧.૪ ટકા હિસ્સો ખરીદશે. રિલાયન્સ રિટેલમાં કુલ રોકાણ ૩૨ હજાર કરોડને પાર થઈ ગયું છે. કંપનીએ ૭.૨૮ ટકા ભાગીદારી વેચીને કુલ ૩૨,૧૯૭.૫૦ કરોડ રૂપિયા એકઠા કર્યાં છે. રિલાયન્સ રિટેલ વેન્ચરનું વર્તમાન મૂલ્ય ૪.૨૮ લાખ કરોડ રૂપિયા છે, જેના પર આ કંપનીઓ રોકાણ કરી રહી છે.
રિલાયન્સ રિટેલ લિમિટેડ ભારતનો સૌથી વધુ નફો કરતો રિટેલ બિઝનેસ છે જે દેશમાં 12000 સ્ટોર્સ અને 640 મિલિયન ફૂટફોલ્સ ધરાવે છે. રિલાયન્સ રિટેલે 20 મિલિયન નાના વેપારીઓને તેમના નેટવર્કનો હિસ્સો બનાવવાની યોજના બનાવી છે.
આ નવા રોકાણ થકી રિલાયન્સ સાથે પાર્ટનર્શીપ કરતાં GIC ઉત્સાહિત છે
GICના CEO લીમ ચોવ કીઆટે જણાવ્યું હતું કે, "આ નવા રોકાણ થકી રિલાયન્સ સાથે પાર્ટનર્શીપ કરતાં GIC ઉત્સાહિત છે. આ રોકાણ ભારતીય રિટેલ ક્ષેત્રના વિકાસ માટે રિલાયન્સ રિટેલને મદદરૂપ બની રહેશે. અમને વિશ્વાસ છે કે, રિલાયન્સ રિટેલ તેની સપ્લાય ચેઇન અને સ્ટોર નેટવર્કનો મહત્તમ ઉપયોગ કરીને ગ્રાહકો અને શેરહોલ્ડર્સના મૂલ્યમાં વધારો કરતું રહેશે."
GIC અને રિલાયન્સ વચ્ચેની ડીલ બાદ રિલાયન્સ ઇન્ડસ્ટ્રીઝના ચેરમેન અને મેનેજિંગ ડિરેક્ટર મૂકેશ અંબાણીએ કહ્યું કે, રિલાયન્સ રિટેલ પરિવારને GICનું સ્વાગત કરતા ખુશી થઈ રહી છે. દુનિયાભરમાં લાંબાગાળાના સફળ રોકાણના ચાર દશકા સુધીના પોતાના ટ્રેડ રેકોર્ડ જાળવી રાખનારી GIC હવે રિલાયન્સ રિટેલ સાથે ભાગીદારી કરી રહી છે. GICનું વૈશ્વિક નેટવર્ક અને લાંબાગાળાની ભાગીદારીનો ટ્રેક રેકોર્ડ ભારતીય રિટેલમાં પરિવર્તન માટે અમૂલ્ય રહેશે.