જો તમે રોજ 5 કલાક કે તેનાથી વધારે સમય સુધી સ્માર્ટફોનનો ઉપયોગ કરતા હો તો તમારે સાવચેત થઈ જવાની જરૂર છે. એક રિસર્ચમાં દાવો કરવામાં આવ્યો છે કે, વધુ સમય ફોન પર વ્યસ્ત રહેનારા વિદ્યાર્થીઓની લાઈફસ્ટાઈલમાં અનેક ખતરનાક પરિવર્તન આવી જાય છે.
તેના કારણે તેમને સ્થૂળતા અને આગળ જતા હ્રદયરોગનો પણ ખતરો રહે છે. કોલંબિયા સ્થિત સિમોન બોલીવર યુનિવર્સિટીના સંશોધકો મિરારી મંટીલા મોરને જણાવ્યું કે, સ્માર્ટફોનનો ઉપયોગ અનેક કામ માટે થઈ શકે છે અને તેને કોઈ પણ સમયે પોતાની સાથે રાખવામાં પણ સરળતા છે, પરંતુ લોકોએ તેની ખૂબીઓ પ્રત્યે આકર્ષિત થવાના બદલે એ વાત સમજવી જોઈએ કે, સ્માર્ટફોન આપણા સ્વાસ્થ્ય માટે કેટલો ખતરનાક છે.
આ સંશોધન માટે 19થી 20 વર્ષના 1060 વિદ્યાર્થીઓને પસંદ કરવામાં આવ્યા હતા. રિસર્ચ અનુસાર, પાંચ કલાક ફોનનો ઉપયોગ કરનારા 43 ટકા વિદ્યાર્થીઓ સ્થૂળતા એટલે કે ઑબેસિટીનો શિકાર બન્યા હતા. મોબાઈલ ફોન હાલના યુગમાં સૌથી મોટી જરૂરિયાત બની ગયો છે. કેટલાક સામાન્ય કામોને બાદ કરતા એક વ્યક્તિ રોજ 10થી 12 કલાક સ્માર્ટફોનને પોતાની પાસે જ રાખે છે અને કેટલાક લોકો તો આના કરતા પણ વધુ સમય સુધી ફોન પોતાની સાથે જ રાખતા હોય છે. કેટલાક એવા લોકો પણ છે, જેઓ રાતે સૂતી વખતે પણ મોબાઈલને ઑન રાખીને પોતાના ઓશિકા પાસે જ મૂકી રાખે છે.
મોબાઈલ ફોનના ઉપયોગમાં મોટાભાગના સમયે ગરદન ઝૂકાવીને નીચે જોવું પડે છે. તેનાથી ગરદનની માંસપેશીઓ ખેંચાઈ શકે છે અને તે અકડાઈ પણ જાય છે. આ નાની એવી ભૂલ ક્યારેક તમારી કમર અને ખભા સુધી પણ અસર કરી શકે છે. આ બીમારીને નેક સિન્ડ્રોમ કહેવામાં આવે છે.
જો તમે લાંબા સમય સુધી મોબાઈલ ફોનનો ઉપયોગ કરો છો તો ઓછામાં ઓછી 20 મિનિટમાં એક વખત તમારી આંખો સ્ક્રીન પરથી હટાવીને શરીરને થોડું સ્ટ્રેચ કરી લેવું હિતાવહ છે. કેટલાક યોગાસનોની મદદથી પણ તમે આ બીમારીથી બચી શકો છે.
મોબાઈલ તમને ડાયાબિટિસ, સ્થૂળતા અને હ્રદયની અનેક ગંભીર બીમારીઓની વણજોઈતી ભેટ પણ આપી શકે છે. હકીકતમાં લાઈટિંગ સ્ક્રીનવાળા ગેઝેટ્સનો મોડી રાત સુધી ઉપયોગ કરવાથી તમારી આંખો પર પ્રભાવ પડે છે અને તમારી ઊંઘ પણ ઉડી જાય છે. તેના કારણે હ્રદયની બીમારીઓની સાથે સ્થૂળતાની સમસ્યા પણ થઈ શકે છે. આંખોમાં ગ્લૂકોમા કે લૉ નાઈટ વિઝનની તકલીફ પણ થવાની શક્યતા છે.
સંશોધકોના મતે આંખો માટે સૌથી હાનિકારક સ્માર્ટફોનની બ્લૂ લાઈટ હોય છે. કેટલાક વૈજ્ઞાનિકોનું માનવું છે કે, મોબાઈલ ફોનથી ઉત્પન્ન થતા રેડિએશનના કારણે અનેક પ્રકારના ટ્યુમર્સ અને કેન્સરનો પણ ખતરો છે.